Osiyo Kubogida ishtirok etgan Eron ayollar terma jamoasi a'zolari vataniga qaytish arafasida jiddiy xavf ostida qoldi. Bunga sabab sifatida futbolchilarning musobaqa davomida o'z mamlakatidagi vaziyatga nisbatan bildirgan norozilik namoyishlari ko'rsatilmoqda. Xususan, Janubiy Koreyaga qarshi o'yin oldidan qizlar davlat madhiyasini kuylashdan bosh tortishgan bo'lsa, Avstraliya bilan bahsda harbiycha salom berish orqali o'z noroziliklarini izhor etishgan edi.
Eron davlat televideniyesi ushbu harakatlarni keskin qoralab, futbolchilarni "urush xoinlari" deb atadi va ularga nisbatan qat'iy jazo choralarini ko'rishni talab qilmoqda. Mahalliy qonunchilikka ko'ra, bunday ayblovlar tasdiqlansa, sportchi qizlar o'lim jazosiga hukm qilinishi mumkinligi xalqaro hamjamiyatda, xususan FIFPRO tashkilotida katta xavotir uyg'otdi.
Guruh bosqichidagi barcha o'yinlarda mag'lubiyatga uchragan Eron terma jamoasi turnirni muddatidan avval tark etgan edi. Hozirda futbolchilarning xavfsizligi va ularning kelgusi taqdiri butun dunyo sport jamoatchiligi diqqat markazida turibdi. Inson huquqlari himoyachilari va xalqaro tashkilotlar vaziyatni yaqindan kuzatmoqda.
“Zamin”ni Telegramʻda oʻqing!
