Turkiyaning “Istanbul Bashakshehir” klubi va O‘zbekiston milliy terma jamoasi hujumchisi Eldor Shomurodov Kun.uz YouTube kanaliga bergan katta intervyusida termadagi o‘zgarishlar, xususan Temur Kapadzening murabbiylik faoliyati haqida ham to‘xtalib o‘tdi. Eldorning aytishicha, Kapadze kelgan zahoti uzoq “kutish”siz ishga kirishgan va jamoa ichida buni normal qabul qilishgan.
“Temur Kapadze jamoaga kelganidan so‘ng tezda ishga kirishib ketdi. Hamma uni qo‘llab-quvvatladi,” — deydi hujumchi.
So‘nggi paytlarda “jamoa yetakchilari Kapadzeni xohlamagan” degan gap-so‘zlar ham aylangan edi. Shomurodov bu mish-mishlarga aniq munosabat bildirdi va bu fikrlarni noto‘g‘ri deb atadi.
Uning ta’kidlashicha, masala Kapadzening shaxsida emas, balki mavsum o‘rtasida “butunlay yangi murabbiy” olib kelish xavfida bo‘lgan. Chunki yangi murabbiy — yangi g‘oya, yangi sxema, yangi talablar degani. Bu esa tayyor jarayonni qaytadan “nol”dan boshlashga o‘xshab qolishi va oxir-oqibat salbiy ta’sir qilishi mumkin edi.
“Yetakchilar Kapadzeni xohlamadi, degan gaplar noto‘g‘ri. Biz faqat yangi murabbiy olib kelishga qarshi edik. Kimdir Kapadzening kelishiga qarshilik bo‘lyapti, deb gap-so‘z chiqarib yubordi. Biz yangi murabbiy kelsa, ko‘p narsa o‘zgarib ketishini bilardik. Yangi g‘oya, yangi taktika — hammasi boshidan boshlanardi. Bu esa oxiriga kelganda salbiy ta’sir qilishi mumkin edi,” — dedi Eldor.
Shomurodov shuningdek, u paytda Katanetsga “oxirigacha biz bilan qoling” degan fikr bo‘lganini ham aytib o‘tdi. Uning mantig‘iga ko‘ra, Jahon chempionatigacha vaqt bor, shundan keyin rejali tarzda qaror qilish mumkin edi.
Lekin keyinchalik Kapadze kelganidan jamoa xursand bo‘lgan. Sababi — u termaning ichki muhitini biladi, futbolchilarni yaxshi taniydi va eng muhimi, tizimni parchalamasdan ishni davom ettirgan. Shu jihat termaga barqarorlik bergani aytildi.
“Keyinchalik esa Temur Kapadze kelganidan xursand bo‘ldik. Sababi, u terma jamoa ichida yurgan, futbolchilarni yaxshi biladi va tizimni buzmasdan ishni davom ettirdi. Bu holatdan biz ham mamnun bo‘ldik. Biz faqat yangi murabbiy olib kelishga qarshi bo‘lganmiz, chunki bu katta risk edi,” — deya xulosa qildi Shomurodov.
Qisqasi, Eldor bu gaplar bilan bitta narsani ravshan qildi: “Kapadzeni xohlamagan” degan mish-mishlar — bo‘rttirilgan. Asosiy xavotir esa o‘sha paytdagi katta risk — jamoaning o‘rnatilgan tizimini keskin o‘zgartirish ehtimoli bo‘lgan.
“Zamin”ni Telegramʻda oʻqing!
