Madridning "Real" klubi hujumchisi Kilian Mbappe ayni damda tizzasidagi jarohatni davolash bilan band. Shunga qaramay, futbolchi mart oyida AQShda o'tkaziladigan o'rtoqlik o'yinlarida Fransiya terma jamoasi tarkibida bo'lishi kutilmoqda. AS nashrining xabar berishicha, Mbappe 26 mart kuni Braziliya va 29 mart kuni Kolumbiyaga qarshi kechadigan bahslar uchun qaydnomaga kiritilgan.
Mutaxassislarning fikricha, futbolchining okean ortiga safari ko'proq tijoriy maqsadlar va homiylar oldidagi majburiyatlar bilan bog'liq. Agar yulduz futbolchi mazkur safarda ishtirok etmasa, Fransiya futbol federatsiyasi katta miqdordagi moliyaviy yo'qotishlarga uchrashi mumkin. Shuning uchun ham tomonlar vaziyatni ehtiyotkorlik bilan baholamoqda.
Biroq bosh murabbiy Didye Desham va tibbiyot xodimlari Kilianning sog'lig'ini xavf ostiga qo'yish niyatida emas. Agar futbolchi o'zini to'liq sog'lom his qilmasa, u maydonga tushirilmaydi. Asosiy maqsad Mbappeni bo'lajak jahon chempionatiga eng yuqori sport formasida yetkazib borishdir. Futbolchining o'zi ham tiklanish jarayonini tezlashtirmaslikka va tavakkal qilmaslikka qaror qilgan.
Hatto Mbappe "Manchester Siti"ga qarshi Yevropa Chempionlar ligasining hal qiluvchi bahslarini ham o'tkazib yuborishga tayyor turibdi. Bu holat Fransiya futbol jamoatchiligida jiddiy xavotirlarni keltirib chiqarmoqda. Eslatib o'tamiz, o'tgan Yevropa chempionatida ham Mbappe burnidan olgan jarohati sababli o'z imkoniyatlarini to'liq namoyish eta olmagan edi. Hozirgi vaziyatda esa uning tizzasidagi muammo jamoa uchun yanada og'riqli nuqtaga aylangan.
“Zamin”ni Telegramʻda oʻqing!
