Angliyaning "Tottenhem Hotspur" klubi o'z tarixidagi eng og'ir davrlardan birini boshdan kechirmoqda. UEFA Chempionlar ligasi 1/8 final bosqichi doirasida Ispaniyaning "Atletiko" jamoasiga qarshi safarda o'tkazilgan dastlabki bahsda londonliklar 2:5 hisobida yirik mag'lubiyatga uchradi. Bu natija nafaqat turnirdagi imkoniyatlarni pasaytirdi, balki klub tarixidagi yangi va yoqimsiz antirekordning qayd etilishiga sabab bo'ldi.
Opta Sport statistik ma'lumotlariga ko'ra, "shporlar" o'z tarixida ilk bor barcha musobaqalarni hisobga olganda ketma ket oltita rasmiy o'yinda mag'lub bo'ldi. Bungacha jamoa Angliya Premyer ligasida beshta o'yinni boy berib, muxlislarini qattiq xafa qilgan edi. Ushbu ketma ket muvaffaqiyatsizliklar fonida klub rahbariyati keskin choralar ko'rishga majbur bo'ldi.
Inqirozli vaziyat tufayli jamoa bosh murabbiyi Tomas Frank iste'foga chiqarilgandi. Uning o'rniga taklif etilgan xorvatiyalik mutaxassis Igor Tudor hamon jamoa o'yinini barqarorlashtira olgani yo'q. Tudor qo'l ostida ham "Tottenhem" o'z darvozasidan ko'plab gollar o'tkazib yuborishda davom etmoqda va maydonda o'z o'yinini topa olmayapti.
Endilikda "Tottenhem" oldida qiyin vazifa turibdi. 2026 yil 18 mart kuni Londondagi "Tottenhem Hotspur" stadionida "Atletiko"ga qarshi javob uchrashuvi bo'lib o'tadi. Jamoa muxlislari o'z maydonida kamida mo'jiza ko'rsatishni kutishmoqda. Biroq bunga qadar Igor Tudor shogirdlarini Angliya Premyer ligasi doirasida "Liverpul"ga qarshi juda og'ir safar o'yini kutib turibdi. Agar jamoa o'z o'yinini tezroq o'nglamasa, mavsum yakuni "Tottenhem" uchun yanada achinarli yakunlanishi mumkin.
“Zamin”ni Telegramʻda oʻqing!
