Jahon futbolida yangi yulduzlar porlashda davom etmoqda va bu safar barcha e’tibor «Barselona»ning yosh iste’dodi Lamin Yamalga qaratilgan. Bukmekerlik koeffitsiyentlariga asoslangan holda The Touchline nashri tomonidan taqdim etilgan ma’lumotlarga ko‘ra, aynan ispaniyalik vunderkind 2026 yilgi “Oltin to‘p” uchun asosiy favorit sifatida ko‘rilmoqda.
Manbaga ko‘ra, hozirgi paytdagi yangilangan reytingda Yamal birinchi pog‘onani egallab turibdi. Undan keyin «Bavariya»ning tajribali goleadori Xarri Keyn, «Real» yulduzi Kilian Mbappe, yana bir «Barselona» vakili Pedri hamda «Manchester Siti»ning hujum mashinasi Erling Xoland joy olgan. E’tiborli jihati shundaki, top-5 ro‘yxatidan ikki nafar kataloniyalik futbolchi o‘rin olgani jamoaning hozirgi kuchli formasini yaqqol namoyon etmoqda.
Lamin Yamalning bu darajaga chiqishi bejiz emas. Yosh futbolchi joriy mavsumdayoq ajoyib statistik ko‘rsatkichlar qayd etmoqda. U «Barselona» safida barcha musobaqalarda 40 ta uchrashuvda ishtirok etib, 21 ta gol urishga erishdi va yana 16 ta golli uzatma bilan jamoadoshlariga yordam berdi. Bu raqamlar uning nafaqat iqtidorli, balki juda samarali o‘yinchiga aylanayotganini ko‘rsatadi.
«Barselona»ning umumiy natijalari ham Yamalning individual yutuqlarini mustahkamlab turibdi. Kataloniya klubi La Ligada 73 ochko bilan peshqadamlikni saqlab kelmoqda. Shu bilan birga, jamoa Yevropa Chempionlar Ligasida ham o‘z yurishini davom ettirib, chorak finalda «Atletiko» bilan kuch sinashishi kutilmoqda.
Albatta, “Oltin to‘p” uchun kurash hali uzoq va oldinda ko‘plab hal qiluvchi bahslar turibdi. Lekin hozirning o‘zidayoq Yamalning bu ro‘yxatda yetakchilik qilishi uning kelajagi qanday bo‘lishini aniq ko‘rsatib turibdi. Agar u shu sur’atni saqlab qolsa, yaqin yillarda dunyo futbolida yangi qirol paydo bo‘lishi hech gap emas.
“Zamin”ni Telegramʻda oʻqing!
