Ruminiya futbol federatsiyasi milliy terma jamoa bosh murabbiyi Mircha Lucheskuning lavozimidan ketganini rasman maʼlum qildi. Taʼkidlanishicha, bu qaror tajribali mutaxassisning sog‘lig‘i bilan bog‘liq jiddiy holatlar ortidan qabul qilingan.
Avvalroq 80 yoshli murabbiy mashg‘ulot oldidan kutilmaganda hushidan ketib, shifoxonaga olib ketilgani haqida xabarlar tarqalgan edi. Keyingi maʼlumotlarga ko‘ra, uning sog‘lig‘ini barqarorlashtirish maqsadida defibrillyator o‘rnatish rejalashtirilgan.
Shu bilan birga, Lucheskuning Ruminiya terma jamoasidagi ikkinchi faoliyati ham yakunlandi. U 2024 yildan buyon jamoani boshqarib kelayotgan bo‘lsa, avvalroq 1981–1986 yillarda ham ushbu jamoa bilan samarali ish olib borgandi. Uning katta tajribasi va futbolga qo‘shgan hissasi muxlislar tomonidan har doim yuqori baholangan.
Eslatib o‘tamiz, Ruminiya JCH–2026 saralash pley-off bosqichida Turkiyaga 0:1 hisobida imkoniyatni boy bergandi. Keyinchalik turklar finalda Kosovoni ham mag‘lub etib, jahon chempionati yo‘llanmasini qo‘lga kiritishga muvaffaq bo‘ldi.
Albatta, Lucheskuning ketishi Ruminiya futboli uchun muhim burilish nuqtasi bo‘lishi mumkin. Endi jamoa yangi murabbiy qo‘l ostida qayta qurilish bosqichini boshlashi kutilmoqda. Eng asosiysi esa — afsonaviy mutaxassisning sog‘ligi. Chunki futbol kutadi, lekin salomatlik — birinchi o‘rinda.
“Zamin”ni Telegramʻda oʻqing!
