Yarim og‘ir vazn toifasida jahon chempioni hisoblangan Dmitriy Bivolning murabbiyi Gennadiy Mashyanov shogirdining kelgusi rejalari va ehtimoliy raqiblari haqida fikr bildirdi. Uning taʼkidlashicha, chempion oldida muhim va jiddiy sinovlar hali oldinda.
Mashyanovning so‘zlariga ko‘ra, Artur Beterbiyev bilan uchinchi jang tashkil etish rejasi kun tartibida bor. Biroq murabbiy hozircha boshqa raqiblarni ham eʼtibordan chetda qoldirmaslik kerakligini alohida taʼkidladi.
«Albatta, Beterbiyev bilan uchinchi to‘qnashuv rejada bor. Lekin shu bilan birga boshqa raqiblarni ham “orqa fon”da qoldirib qo‘ymasligimiz kerak. Xudo xohlasa, keyingi variantlarni ko‘rib chiqamiz. Ularning soni ko‘p emas — Artur Beterbiyev va Devid Benavides», — dedi murabbiy.
Eslatib o‘tamiz, Bivol va Beterbiyev o‘rtasidagi avvalgi ikki jang ham juda keskin va teng kurash ostida o‘tgan. Har ikki bellashuv ham to‘liq 12 raund davom etgan va bokschilar bir martadan g‘alaba qozonib, hisobni tenglashtirishgan. Shu bois ehtimoliy uchinchi jang haqiqiy megaqarshilik sifatida kutilayotgani bejiz emas.
Maʼlumot uchun, 30 may kuni Yekaterinburg shahrida Dmitriy Bivol nemis sportchisi Mixael Ayfertga qarshi ringga ko‘tariladi. Ushbu jangda u yarim og‘ir vazndagi WBA, IBF va WBO kamarlarini himoya qiladi.
Qisqasi, Bivol oldida tanlov katta emas, lekin har bir variant — top-level. Demak, keyingi janglar “oddiy fayt” emas, to‘g‘ridan-to‘g‘ri tarix yoziladigan kechalar bo‘ladi.
“Zamin”ni Telegramʻda oʻqing!
