Jahon chempionatiga tayyorgarlik jarayoni qizg‘in tus olgan bir paytda Argentina milliy terma jamoasi bo‘lajak o‘rtoqlik uchrashuvlaridagi raqiblarini rasman maʼlum qildi. “Albiseleste” muxlislari uchun esa iyun oyi juda muhim sinovlarga boy bo‘ladi.
Argentina futbol assotsiatsiyasi maʼlumotiga ko‘ra, jamoa iyun oyida ikki tajriba uchrashuvi o‘tkazadi. 6 iyun kuni argentinaliklar Gonduras terma jamoasiga qarshi maydonga tushadi. 9 iyun kuni esa Islandiya termasiga qarshi navbatdagi sinov kutib turibdi. Qizig‘i shundaki, har ikki o‘yin ham AQSH hududida o‘tkaziladi, bu esa JCH muhitiga moslashish uchun muhim imkoniyat hisoblanadi.
Hozirgi kunda Argentina Jahon chempionatiga amaldagi chempion sifatida yo‘l oladi. Jamoa guruh bosqichida Aljir, Avstriya va Iordaniyaga qarshi kurash olib boradi. Bu tarkib “albiseleste” uchun oson emas — raqiblar har biri o‘ziga xos uslubga ega.
Eslatib o‘tamiz, so‘nggi mundialda Argentina Lionel Skaloni boshchiligida Fransiyaga qarshi o‘ta dramatik finalda g‘alaba qozongan edi. Asosiy vaqt 3:3 hisobida yakunlangan, penaltilar seriyasida esa argentinaliklar sovrinni qo‘lga kiritgan.
Endi esa jamoa oldida yangi maqsad — chempionlikni himoya qilish vazifasi turibdi. Tayyorgarlik esa hozirdanoq “temir rejim”da ketmoqda.
“Zamin”ni Telegramʻda oʻqing!
