Kecha, 12 aprel kuni Kiprda o‘tkazilayotgan shaxmat bo‘yicha Nomzodlar turnirining 12-tur uchrashuvlari bo‘lib o‘tdi. Unda ishtirok etayotgan o‘zbekistonlik grossmeyster Javohir Sindorov AQSHlik Hikaru Nakamuraga qarshi durang natija qayd etib, musobaqadagi ochkolarini to‘qqiztaga yetkazdi.
Ushbu bellashuvdan so‘ng Sindorov hamda ikkinchi o‘rinda borayotgan Gri Anish o‘rtasidagi farq ikki ochkoga teng bo‘lib turibdi. Aytilishicha, keyingi turdagi durang natijasi ham o‘zbekistonlik shaxmatchini turnir g‘olibligiga olib chiqishi mumkin. Shuningdek, Anish 13-turda mag‘lub bo‘lsa yoki durang o‘ynasa ham, Sindorov keyingi ikki tur natijasidan qat’i nazar Nomzodlar turniri g‘olibi bo‘lishi ehtimoli yuqori.
Nakamuraga qarshi partiyadan so‘ng Sindorov o‘z fikrlari bilan o‘rtoqlashdi.
Bugun biroz dam olaman. Balki Counter-Strike ham o‘ynarman. Oxirgi turlarda esa imkoni boricha ishonchli o‘ynash kerak. Kimdir meni yengishga harakat qilsa va imkoniyat paydo bo‘lsa, albatta undan foydalanaman, lekin hozir majburan g‘alaba izlash shart emas”, dedi Sindorov.
Shuningdek, u so‘nggi vaqtlarda o‘zi hamda qozog‘istonlik Bibisora Assaubayeva haqida ijtimoiy tarmoqlarda tarqalayotgan fikrlarga e’tibor qaratmayotganini va bu mavzular unga qiziq emasligini alohida ta’kidladi.
Ma’lumot uchun, Sindorov 13-tur doirasida 14 aprel kuni ikkinchi o‘rinda borayotgan niderlandiyalik Gri Anishga qarshi bahs olib boradi.
