Foto: championat.asia
Joriy yilning 10 aprel kuni O‘zPFL huzuridagi Tartib-intizom qo‘mitasining navbatdagi yig‘ilishi bo‘lib o‘tdi. Bu haqda Liga matbuot xizmati rasman maʼlum qildi.
Yig‘ilish davomida shu vaqtgacha O‘zbekiston Superligasi hamda U-21 chempionati uchrashuvlarida qayd etilgan qoidabuzarliklar atroflicha ko‘rib chiqilib, tegishli qarorlar qabul qilindi.
Asosiy eʼtibor Superliganing 5-turida “Bunyodkor” va “Lokomotiv” o‘rtasidagi bahsdan keyin yuzaga kelgan janjalli vaziyatga qaratildi. Ushbu o‘yin yakunida ikki jamoa vakillari o‘rtasida kelishmovchilik yuzaga kelib, bu holat keng jamoatchilik muhokamasiga sabab bo‘lgan.
Holat maxsus tartibda o‘rganilib, O‘FAning futbol faoliyatini nazorat qilish bo‘yicha inspeksiyasi tomonidan barcha materiallar tahlil qilindi. Shuningdek, videoyozuvlar, guvohlar ko‘rsatmalari va komissar hisobotlari ham o‘rganildi.
Tekshiruv natijalariga ko‘ra, uchrashuvdan so‘ng “Bunyodkor” seleksioner murabbiyi Bek Abdullayev va “Lokomotiv” futbolchisi Abdulloh Yo‘ldoshev o‘rtasida nizo kelib chiqqan, vaziyatga Narimon Ahmadjonov ham aralashgani oqibatida yengil tan jarohatlari qayd etilgan.
Shu bilan birga, o‘yinning 62-daqiqasida Yo‘ldoshev Ahmadjonovga nisbatan qo‘pol harakat qilgani uchun ogohlantirish olgani ham qayd etildi. Keyinchalik aynan shu epizod ortidan nizo kuchaygan va oxir-oqibat o‘yindan keyin mushtlashuvga aylangan.
Vaziyatga Milliy gvardiya xodimlari aralashib, ishtirokchilarni ichki ishlar bo‘limi tayanch punktiga olib borgan. Keyinchalik tomonlar bir-biriga daʼvosi yo‘qligini bildirgach, ular qo‘yib yuborilgan.
Qo‘mita barcha materiallarni o‘rganib chiqib, quyidagi qarorlarni qabul qildi:
- “Bunyodkor” klubiga jarima jazosi qo‘llanildi;
- “Lokomotiv” klubiga ham jarima jazosi belgilandi;
- Bek Abdullayevga nisbatan jarima jazosi qo‘llandi;
- Narimon Ahmadjonov 3 o‘yinga diskvalifikatsiya qilindi;
- Abdulloh Yo‘ldoshev ham 3 o‘yinga chetlatildi.
Liga taʼkidlashicha, bunday holatlar futbolda intizomni saqlash va qoidalarga qatʼiy amal qilish muhimligini yana bir bor ko‘rsatdi.
“Zamin”ni Telegramʻda oʻqing!
