«Bavariya» sport direktori Maks Eberl klub «Chelsi»dan ijaraga olingan hujumchi Nikolas Jeksonni 65 million yevroga sotib olish huquqidan foydalanmasligini ma'lum qildi. Ushbu qarordan so'ng futbolchining agenti Diomansi Kamara ijtimoiy tarmoqlar orqali o'z munosabatini bildirdi. Bu haqda Goal.com xabar beradi.
Kamara o'z postida Jeksonning joriy mavsumdagi natijalarini yuqori baholab, uning 28 ta o'yinda 10 ta gol urgani, Germaniya kubogi finaliga chiqqani va Bundesliga chempionligini qo'lga kiritganini ta'kidladi. Biroq klub rahbariyati futbolchining ko'rsatkichlari 65 million yevrolik narxga mos kelmaydi deb hisoblamoqda.
Statistik ma'lumotlarga ko'ra, senegallik hujumchi urgan gollarning aksariyati oson g'alaba qozonilgan o'yinlarda zaxiradan tushganidan so'ng qayd etilgan. Jekson «Real Madrid»ga qarshi Yevropa Chempionlar ligasi chorak finali va «Bayer» bilan kubok yarim finali kabi muhim bahslarni to'liq zaxira o'rindig'ida o'tkazdi.
Shuningdek, «Al-Nasr» klubiga o'tgan Kingsli Koman YCHL yarim finalida sobiq jamoasi «Bavariya»ga muxlislik qilishini aytdi. U «PSJ» tarbiyalanuvchisi bo'lishiga qaramay, Myunxen klubi bilan yaqinroq aloqada ekanini va do'stlarini qo'llab-quvvatlashini bildirdi.
«Bavariya» tarkibida yo'qotishlar ham mavjud. Lennart Karl va Tom Bishof mushaklaridagi jarohat sababli «PSJ»ga qarshi yarim finalning dastlabki uchrashuvini o'tkazib yuborishi kutilmoqda.
Har ikki futbolchi javob o'yinigacha safga qaytishni rejalashtirgan.
“Zamin”ni Telegramʻda oʻqing!
