«Manchester Yunayted» jamoasi «Brentford» bilan o'yinga boshqa homiy logotipi tushirilgan libosda chiqadi
«Manchester Yunayted» jamoasi Angliya Premyer ligasi doirasida «Brentford»ga qarshi bo'lib o'tadigan uchrashuvda o'zgacha ko'rinishdagi liboslardan foydalanadi. Klub global sog'liqni saqlash muammolariga qarshi kurashish uchun mablag' yig'ish maqsadida asosiy homiy logotipini vaqtincha almashtirishga qaror qildi. Bu haqda Goal.com xabar beradi.
Maykl Kerrik boshchiligidagi jamoa maydonga old qismida «(RED)» yozuvi tushirilgan maxsus nashrdagi futbolkalarda chiqib keladi. «Manchester Yunayted», «MatchWornShirt» va «(RED)» tashkilotlari o'rtasidagi hamkorlik doirasida muxlislar ushbu noyob liboslarni sotib olish imkoniyatiga ega bo'ladilar.
«MatchWornShirt» asoschilaridan biri Teymen Zonderveykning ta'kidlashicha, ushbu loyiha muxlislarning futbolga bo'lgan ishtiyoqini dunyo miqyosidagi hayotiy muhim dasturlarni qo'llab-quvvatlashga yo'naltiradi. O'yinda kiyilgan va futbolchilar tomonidan imzolangan liboslar kimoshdi savdosiga qo'yiladi.
«(RED)» ijrochi direktori Keyt Charlzning so'zlariga ko'ra, har bir futbolka maydondagi voqealar bilan birga, tibbiy yordamga muhtoj jamoalarga ko'maklashish tarixini ham o'zida mujassam etadi. Xayriya aksiyasi 27-apreldan 2-mayga qadar davom etishi belgilangan.
“Zamin”ni Telegramʻda oʻqing! 
