Yevropa Chempionlar Ligasi yarimfinal bosqichining ilk bahslari kutilganidek keskin va gollarga boy tarzda oʻtdi. Eng yorqin oʻyinlardan biri Parijda boʻlib oʻtdi, unda PSJ oʻz maydonida "Bavariya"ni 5:4 hisobida magʻlub etdi. Shu bilan birga, Madriddagi qarama-qarshilikda "Atletiko" Madrid va "Arsenal" gʻolibni aniqlay olmadi — 1:1.
Bir qarashda natijalar tengdek koʻrinsa-da, statistik tahlillar mutlaqo boshqacha manzarani koʻrsatmoqda. Opta superkompyuteri yangilangan hisob-kitoblarini eʼlon qildi va unga koʻra, hozirgi paytda asosiy favorit sifatida “Arsenal” koʻrilmoqda. Londonliklarning chempionlik ehtimoli 39 foizga baholangan.
Ikkinchi oʻrinda Parij klubi joylashgan — “PSJ”ning gʻalaba qozonish imkoniyati qariyb 31 foizni tashkil etmoqda. Uchinchi pogʻonada esa “Bavariya” qayd etilgan boʻlib, uning imkoniyatlari 22 foiz atrofida baholangan. Eng past koʻrsatkich esa “Atletiko”ga tegishli — madridliklar finalga chiqish va sovrinni qoʻlga kiritish imkoniyati 8 foizdan kam deb hisoblanmoqda.
Albatta, bu raqamlar faqat taxmin va modellashtirilgan hisob-kitoblar. Maydonda esa barchasi oʻzgarishi mumkin. Chunki yarimfinal bosqichida har bir kichik xatoning oʻzi taqdirni hal qilishi mumkin.
Endi barcha eʼtibor javob oʻyinlariga qaratilgan. Ular 5 va 6 may kunlari London hamda Myunxen shaharlarida boʻlib oʻtadi. Final esa 30 may kuni Budapeshtda tashkil etiladi.
Qisqacha aytganda, raqamlar “Arsenal”ni favorit demoqda. Lekin Chempionlar Ligasi shunday turnirki, bu yerda hisob-kitoblar emas, xarakter va hal qiluvchi lahzalar gʻalaba keltiradi.
“Zamin”ni Telegramʻda oʻqing!
