Jahon toji uchun jang: Shaxmat elitasi nega Gukeshga qarshi bahsda Sindarovni favorit deb hisoblamoqda?

2026 yilgi shaxmat olamining eng kutilgan va muhim voqeasi — amaldagi jahon chempioni Gukesh Dommaraju hamda da’vogar Javohir Sindarov o‘rtasidagi Jahon toji uchun kechadigan match tobora yaqinlashmoqda. Jenevada bo‘lib o‘tadigan ushbu tarixiy uchrashuv oldidan dunyoning yetakchi grossmeysterlari, taniqli ekspertlari va mashhur shaxmat blogerlari o‘z taxminlari bilan o‘rtoqlashdi.

UzChess xabari hamda rookreview.com tahliliy platformasi jamlagan 18 nafar nufuzli mutaxassisning xulosalariga ko‘ra, ustunlik kutilmaganda O‘zbekiston vakili tomonida:

• 10 nafar ekspert — Javohir Sindarovni bo‘lajak matchning asosiy favoriti deb biladi.

• 6 nafar mutaxassis — ikki yosh vunderkindning imkoniyatlarini teng (50/50) baholagan.

• Atigi 2 kishi — hindistonlik amaldagi chempion Gukeshning g‘alabasiga ishonch bildirgan.

Karlsen Sindarovni tanladi, Nakamura esa Gukesh tomonda

Shaxmat bo‘yicha ko‘p karra jahon chempioni va sayyoramizning birinchi raqamli shaxmatchisi Magnus Karlsen ochiqchasiga Sindarovning muvaffaqiyatini kutayotganini bildirgan. Norvegiyalik yulduz o‘zbek grossmeysterining o‘yinini har tomonlama mukammalroq va barqarorroq deb atagan.

Jahon toji uchun ikki bor bahs olib borgan Yan Nepomnyashiy imkoniyatlarni 65:35, rossiyalik kuchli grossmeyster Vladislav Artemiyev esa 60:40 nisbatida aynan Sindarov foydasiga baholagan. Shuningdek, grossmeyster Aleksandr Shimanov Sindarovning imkoniyatini hatto 100% deb ko‘rsatgan bo‘lsa, Lyuk Maksheyn va Andrey Yesipenko ham Javohirni «aniq favorit» sifatida e’tirof etgan.

Bunga zid ravishda, AQSH vakili Hikaru Nakamura Gukeshni mutlaq favorit (100%) deb atab, amaldagi chempion ruhiy bosimni yengib o‘ta olsa, raqibiga hech qanday imkoniyat qoldirmasligi mumkinligini ta’kidlagan. Belarus vakili Denis Lazavik ham Gukeshning tarafini olgan kam sonli ekspertlardan bo‘ldi.

Ekspertlar fikri va baholarining to‘liq jadvali:

Toj uchun jang qachon va qayerda bo‘ladi?

Gukesh Dommaraju hamda Javohir Sindarov o‘rtasidagi FIDE Jahon chempionligi matchi 22 noyabrdan 12 dekabrgacha Shveysariyaning Jeneva shahrida bo‘lib o‘tadi.

Reglamentga muvofiq, ilk klassik partiya 24 noyabr kuni boshlanadi. Shaxmat mutaxassislarining ko‘pchiligi ustunlikni hamyurtimizga berayotgani bahs oldidan qiziqish va intrigani misli ko‘rilmagan darajada oshirib yubordi.