Borussia Dortmund bosh murabbiyi Niko Kovac hujumchi Karim Adeyemi bilan munosabatlari yomonlashgani haqidagi xabarlarni keskin rad etdi. Mutaxassis germaniyalik futbolchining ulkan salohiyatga ega ekanligini va kelajakda jahon darajasidagi yulduzga aylanishi mumkinligini ta'kidladi. Adeyemi joriy mavsumda 37 ta o‘yinda maydonga tushib, 10 ta gol va 5 ta golli uzatmaga mualliflik qildi. Bu haqda Goal.com xabar beradi.
Kovacning so‘zlariga ko‘ra, Adeyemi o‘z ustida ishlashda davom etishi va mashg‘ulotlarda yanada aniqroq harakat qilishi kerak. Hujumchiga Manchester United va Newcastle kabi ingliz klublari qiziqish bildirayotgani haqida xabarlar tarqalgan bo‘lsa-da, Dortmund rahbariyati jamoada barqarorlikni saqlab qolishga intilmoqda.
Shuningdek, Niko Kovac o‘zining Dortmunddagi kelajagi haqidagi savollarga ham javob berdi. U klub rahbariyati bilan hamkorlikdan mamnunligini va Lars Ricken bilan birgalikda jamoani rivojlantirishda davom etishni istashini bildirdi. Murabbiyning amaldagi shartnomasi 2027-yilga qadar mo‘ljallangan.
Murabbiy yosh futbolchilarga imkoniyat bermasligi haqidagi tanqidlarga ham munosabat bildirdi. U o‘z faoliyati davomida Aurelien Tchouameni, Marcelo Brozovic va Mateo Kovacic kabi ko‘plab iqtidorli o‘yinchilarni tarbiyalab, katta futbolga olib chiqqanini eslatib o‘tdi.
“Zamin”ni Telegramʻda oʻqing!
