Dusan Vlahovic va Yuventus oʻrtasidagi shartnoma muzokaralari qiyin kechmoqda

Dusan Vlahovic maydonda oʻzining sermahsul oʻyinini qayta topgan boʻlsa-da, uning Yuventusdagi kelajagi hamon mavhumligicha qolmoqda. Klub va hujumchining vakillari oʻrtasida oʻtkazilgan bir necha bosqichli muzokaralarga qaramay, tomonlar kelishuvga erisha olmayapti. Bu haqda Goal.com xabar beradi.

Serbiyalik futbolchi Hellas Verona darvozasiga kiritgan goli bilan uzoq davom etgan golli qurgʻoqchilikka chek qoʻydi. Biroq, bu muvaffaqiyat klub rahbariyati va futbolchi vakillari oʻrtasidagi moliyaviy kelishmovchiliklarni yashira olmayapti. Ayni damda tomonlar oʻrtasidagi asosiy muammo maosh miqdori emas, balki agentlik komissiyalari va shartnoma imzolash uchun talab qilinayotgan qoʻshimcha bonuslar boʻlib turibdi.

La Gazzetta dello Sport xabariga koʻra, tomonlar shu kungacha besh marta uchrashgan. Vlahovic tomoni maoshni Kenan Yildiz shartnomasiga oʻxshash tarzda, yaʼni yiliga 7 million yevrogacha kamaytirishga rozi boʻlgan boʻlsa-da, klub qoʻshimcha xarajatlar boʻyicha yon berishni istamayapti.

Yuventus rahbariyati moliyaviy barqarorlikni saqlash maqsadida qatʼiy pozitsiyada turibdi. Shartnoma muddati tugashiga oz vaqt qolgan bir paytda, klub oʻz moliyaviy chegaralaridan tashqariga chiqmasligini maʼlum qildi. Agar yaqin orada kelishuvga erishilmasa, yozgi transfer oynasida hujumchining jamoani tark etish ehtimoli oshadi.