Urugvaylik afsonaviy hujumchi Luis Suarez Inter Miami bilan shartnomasini uzaytirish qarori ortida futbolga bo‘lgan o‘chmas ishtiyoqi turganini ma’lum qildi. 39 yoshli futbolchi yoshi o‘tganiga qaramay, Lionel Messi bilan birgalikda maydonda o‘zini ko‘rsatishda davom etishni istaydi. Bu haqda Goal.com xabar beradi.
O‘tgan mavsumda, xususan MLS pley-off bosqichida murabbiy Xavyer Maskerano qo‘l ostida zaxirada qolib ketgan Suarez bu holatni professional tarzda qabul qilganini ta’kidladi. Uning so‘zlariga ko‘ra, o‘yin amaliyotining kamayishi dastlab tushunarsiz tuyulgan bo‘lsa-da, u o‘z ustida ishlashda davom etgan.
Vaqtinchalik bosh murabbiy Gilyermo Xoyos qo‘l ostida yana asosiy tarkibga qaytgan hujumchi joriy mavsumda 7 ta o‘yinda 2 ta gol va 2 ta golli uzatmaga mualliflik qildi. Suarez bu qiyinchiliklar uning sabr-toqatini charxlaganini va o‘ziga bo‘lgan ishonchini qaytarganini qayd etdi.
Shartnomani bir yilga uzaytirish qarori futbolchining hali ham yuqori darajada raqobatlashishga qodirligini anglatadi. Suarez mag‘lubiyatlardan xafa bo‘lish va gol urishdan zavqlanish hissi hali hamon kuchli ekanligini, ayniqsa Lionel Messi bilan birga o‘ynash unga katta motivatsiya berishini qo‘shimcha qildi.
“Zamin”ni Telegramʻda oʻqing!
