Arsenal yarim himoyachisi Kristian Norgor Daniya terma jamoasidagi faoliyatini yakunlaganini rasman e'lon qildi. 32 yoshli futbolchi terma jamoa navbatdagi jahon chempionatiga chiqa olmaganidan so'ng, shunday qarorga kelganini ma'lum qildi. Bu haqda Goal.com xabar beradi.
Norgor o'zining Instagram sahifasi orqali muxlislarga murojaat qilib, bu qaror uning uchun hissiyotlarga boy bo'lganini ta'kidladi. U terma jamoa safida 41 ta o'yinda maydonga tushgan va ko'plab unutilmas lahzalarni boshdan kechirgan.
Futbolchi oilasiga ko'proq vaqt ajratish istagi va terma jamoadagi yosh iqtidorli o'yinchilarga yo'l ochib berish zarurati bu qarorga kelishida asosiy omil bo'lganini qayd etdi. Uning so'zlariga ko'ra, Daniya terma jamoasi bosh murabbiyi Brayan Rimer unga katta ishonch bildirgan, ammo endi u faoliyatini faqat muxlis sifatida davom ettirishni ma'qul ko'rmoqda.
Kristian Norgor o'z faoliyatidagi eng yorqin damlardan biri sifatida 2025-yilda Portugaliyaga qarshi o'yindagi g'alabani esladi. U terma jamoa safidagi so'nggi o'yinini mart oyida Chexiyaga qarshi o'tkazgan edi.
“Zamin”ni Telegramʻda oʻqing!
