Barselona va Real Madrid oʻrtasidagi azaliy raqobat navbatdagi keskin pallaga kirdi. Real Madrid prezidenti Florentino Peres Negreyra ishi boʻyicha kataloniyaliklarni keskin tanqid qilib, klubdan 14 ta chempionlik unvoni «oʻgʻirlanganini» daʼvo qildi. Bu haqda Goal.com xabar beradi.
Peresning soʻzlariga koʻra, Barselona hakamlar qoʻmitasi sobiq vitse-prezidentiga toʻlovlar amalga oshirgani Ispaniya futboli tarixidagi eng katta korrupsiya mojarosidir. U bu holat musobaqa yaxlitligiga putur yetkazayotganini taʼkidlab, UEFAga 500 sahifalik maxsus hisobot taqdim etishini maʼlum qildi.
Barselona rahbariyati esa ushbu ayblovlarni rad etib, toʻlovlar faqat hakamlar boʻyicha texnik hisobotlar uchun amalga oshirilganini taʼkidladi. Klub matbuot xizmati Peresning bayonotlarini huquqiy nuqtai nazardan tahlil qilayotganini va javob choralari koʻrilishini bildirdi.
Ushbu mojaro Ispaniya futbolidagi muhitni yanada taranglashtirib yubordi. Tomonlar oʻz haqiqatlarini isbotlash uchun sud va xalqaro tashkilotlar orqali kurashishga tayyorligini namoyish etmoqda.
“Zamin”ni Telegramʻda oʻqing!
