Real Madrid prezidenti Florentino Perez jamoaning joriy mavsumdagi qiyinchiliklaridan so‘ng yozgi transferlar oynasida faol bo‘lishini ma’lum qildi. U o‘z intervyusida klub an’anaga ko‘ra dunyoning eng yaxshi futbolchilarini jalb etishda davom etishini ta’kidlab, o‘tmishdagi yulduzli transferlarni esga oldi. Bu haqda Goal.com xabar beradi.
Erling Xoland masalasiga to‘xtalgan Perez, bu kabi transfer masalalari sport boshqaruvi vakillari zimmasida ekanligini aytib, aniq izoh berishdan tiyildi. Shuningdek, u jamoa ichidagi kelishmovchiliklar haqidagi xabarlarni rad etib, futbolchilar o‘rtasidagi munosabatlar a’lo darajada ekanligini qo‘shimcha qildi.
Klubdagi kiyim almashtirish xonasidan ma’lumotlar sizib chiqishi bo‘yicha prezident aybdor topilganini, ammo ismlarni oshkor qilmasligini bildirdi. Murabbiylar shtabi, xususan Xabi Alonso va Alvaro Arbeloa atrofidagi mish-mishlarga izoh berar ekan, jamoada boshqaruv murabbiylar qo‘lida ekanligini ta’kidladi.
Vinicius Junior bilan shartnomani uzaytirish masalasiga ham to‘xtalgan Perez, shoshilishga hojat yo‘qligini va braziliyalik hujumchi klubning eng muhim o‘yinchilaridan biri bo‘lib qolishini qayd etdi. U futbolchilar bilan shaxsiy munosabatlarga kirmasligini, jumladan, Kylian Mbappe bilan ham faqat salomlashish bilan cheklanishini qo‘shimcha qildi.
“Zamin”ni Telegramʻda oʻqing!
