Real Madrid bosh murabbiyi lavozimiga Jose Mourinhoni qaytarishni rejalashtirmoqda, biroq bu transfer oson kechmaydi. Portugaliyalik mutaxassisning hozirgi klubi Benfika bilan tuzgan shartnomasida maxsus tovon puli bandi mavjud bo‘lib, unga ko‘ra, Madrid klubi murabbiyni olib ketish uchun qariyb 7 million yevro to‘lashi talab etiladi. Bu haqda Goal.com xabar beradi.
Record nashrining xabar berishicha, ushbu tovon puli mavsum yakunlanganidan keyingi 10 kunlik muddat ichida shartnoma bekor qilingan taqdirda amal qiladi. Benfika prezidenti Rui Costa jamoada barqarorlikni saqlab qolish maqsadida Mourinhoga yangi shartnoma taklif qilgan va murabbiyning qarorini kutmoqda.
Real Madrid prezidenti Florentino Perez esa klubdagi saylov jarayonlari va boshqaruv masalalariga e’tibor qaratgan. U murabbiy almashinuvi haqidagi savollarga aniq javob berishdan qochib, hozirgi asosiy maqsad klubni a’zolarga qaytarish ekanligini ta’kidladi.
Agar Mourinho Madridga yo‘l oladigan bo‘lsa, Benfika rahbariyati uning o‘rniga nomzodlar izlashni boshlab yuborgan. Asosiy da’vogar sifatida Angliya Premer-ligasida muvaffaqiyatli ishlayotgan Fulxem bosh murabbiyi Marco Silva ko‘rilmoqda.
“Zamin”ni Telegramʻda oʻqing!
