Liverpul darvozaboni Alisson Becker kelayotgan yozgi transfer oynasida Yuventus safiga qoʻshilishga tayyor. Braziliyalik posbon Turin klubining yangi loyihasiga toʻliq ishonmoqda va jamoa kelasi mavsumda Chempionlar ligasiga yoʻllanma ololmasa ham, A Seriyaga qaytishga qaror qilgan. La Gazzetta dello Sport nashrining xabariga koʻra, darvozabon transfer boʻyicha Turin klubiga yashil chiroq yoqqan. Bu haqda Goal.com xabar beradi.
Hozirda Luciano Spalletti qoʻl ostidagi Yuventus turnir jadvalida oltinchi oʻrinda bormoqda va Yevropaning eng nufuzli musobaqasidan quruq qolish xavfi ostida turibdi. Shunga qaramay, Alissonning vakillari futbolchining har qanday holatda ham Turinga koʻchib oʻtish istagi qatʼiy ekanini tasdiqlashdi. Tajribali darvozabon yakshanba kuni Brentfordga qarshi oʻyinda Liverpul muxlislari bilan xayrlashishga tayyorgarlik koʻrmoqda.
Arne Slot braziliyalik posbonni asosiy tarkibda maydonga tushirishi kutilmoqda, bu esa unga Mersisaydagi sakkiz yillik faoliyatiga munosib yakun yasash imkonini beradi. Liverpul safida Alisson ikki bor Angliya Premer-ligasi, Chempionlar ligasi va boshqa koʻplab sovrinlarni qoʻlga kiritdi. Biroq soʻnggi vaqtlardagi jarohatlar va Giorgi Mamardashvili transferi uning jamoadagi oʻrnini soʻroq ostida qoldirdi.
Alissonning Liverpul bilan shartnomasi 2027-yilgacha amal qiladi, shu sababli Yuventus transfer borasida ingliz klubi bilan kelishib olishi kerak. Turinliklar braziliyalik posbonni jamoaning qayta tiklanish jarayonidagi asosiy yetakchi sifatida koʻrmoqda. Muzokaralar yaqin uch hafta ichida, yaʼni Jahon chempionati boshlangunga qadar yakunlanishi rejalashtirilgan.
“Zamin”ni Telegramʻda oʻqing!
