Manchester Yunayted afsonasi Gari Nevill Angliya Premer-ligasining joriy mavsumida omon qolish uchun kurashgan Tottenxem jamoasini keskin tanqid ostiga oldi. Soʻnggi turda Everton ustidan qozonilgan 1:0 hisobidagi gʻalaba jamoaga elitada qolish imkonini bergan boʻlsa-da, Nevill klubning umumiy natijasini "achinarli" deb atadi. Uning fikricha, bunday resurslarga ega klub quyi ligaga tushib ketishiga bir bahya qolganidan uyalishi kerak. Bu haqda Goal.com xabar beradi.
Nevill Sky Sports nashriga bergan intervyusida Tottenxem oʻzining boy anʼanalariga mos kelmaydigan darajaga tushib qolganini taʼkidladi. "Ularni achinarli deb atash mubolagʻa emas. Oʻtgan yili Yevropa ligasida gʻolib chiqishgan boʻlsa-da, ichki chempionatda soʻnggi ikki yil davomida jamoa oʻz darajasidan ancha past oʻyin koʻrsatmoqda. Bu klub uchun yangi tubsizlikdir", — dedi sobiq himoyachi.
Ekspert futbolchilarning maydondagi ishtiyoqi va klub shioriga boʻlgan munosabatini ham masxara qildi. Tottenxemning mashhur "To dare is to do" (Tavakkal qilish — bu amalga oshirishdir) shioriga toʻxtalar ekan, Nevill hozirgi tarkibda na jasorat va na jamoaviy birlik borligini aytdi. Uning soʻzlariga koʻra, koʻplab futbolchilar bu libosni kiyishga loyiq emas.
Shuningdek, Nevill klub rahbariyatini ham tartibsiz boshqaruvda aybladi. Ange Postecoglou ketganidan keyin Thomas Frank va Igor Tudor kabi murabbiylarning qisqa muddatli faoliyati klubdagi inqirozni yanada chuqurlashtirgan. Nevillning fikricha, egalar klubni sotish payida boʻlib, infratuzilmaga eʼtibor qaratishgan, biroq maydondagi natijalar boʻyicha muxlislarni xafa qilishgan.
Yangi bosh murabbiy Roberto De Zerbi oldida juda ogʻir vazifa turganini aytgan Nevill, klubda tub islohotlar oʻtkazilishi shartligini bildirdi. Uning taʼkidlashicha, Tottenxem oʻzligini qaytarishi uchun nafaqat tarkibni, balki butun boshqaruv tizimini qayta koʻrib chiqishi lozim.
“Zamin”ni Telegramʻda oʻqing!
