Braziliya futboli afsonasi Kaka GOAL nashriga bergan eksklyuziv intervyusida 20 yoshida Jahon chempioni boʻlgani, Vinicius Junior va Neymar zimmasidagi ulkan masʼuliyat hamda "Selesao"ning oltinchi yulduz haqidagi orzulari haqida soʻzlab berdi. 2002-yilgi mundialda Kaka asosan zaxirada oʻtirgan boʻlsa-da, u Ronaldinho, Ronaldo va Rivaldo kabi buyuk ustozlardan saboq olganini taʼkidladi. Bu haqda Goal.com xabar beradi.
"Oʻshanda men har kuni ularni kuzatardim. Mashgʻulotlarda oʻzini tutishi, oʻyin uslubi — bularning barchasi men uchun maktab edi. Uchta Oltin toʻp sohibi bilan bir jamoada boʻlish aqlbovar qilmas tajriba edi", — deydi Kaka oʻsha davrlarni yodga olib. Garchi u oʻsha turnirda bor-yoʻgʻi 25 daqiqa harakat qilgan boʻlsa-da, kubokni boshi uzra baland koʻtarish hissi uning faoliyatida oʻchmas iz qoldirgan.
Kaka Braziliya terma jamoasida oʻynashning oʻziga xos bosimi haqida ham toʻxtalib oʻtdi. Uning soʻzlariga koʻra, bu bosimni tushuntirib berish qiyin va uni hech narsa bilan tenglashtirib boʻlmaydi. Hozirgi kunda Vinicius Junior va Neymar kabi yulduzlar aynan mana shu yukni oʻz yelkalarida koʻtarib kelishmoqda. Braziliyalik boʻlish va futbol oʻynash — bu shunchaki klublardagi muvaffaqiyat emas, balki butun bir millat umidini oqlash demakdir.
Faoliyati davomida Milan bilan Chempionlar ligasi gʻolibi boʻlgan va 2007-yilda Oltin toʻpni qoʻlga kiritgan Kaka, tarixdagi eng buyuk oʻyinchilardan biri hisoblanadi. U Jahon chempionati, Chempionlar ligasi va Oltin toʻpni yutgan kam sonli 10 nafar futbolchidan biridir. Real Madrid va São Paulo klublarida ham toʻp surgan afsona, Braziliya futbolining evolyutsiyasini bevosita ichidan his qilgan inson sifatida oʻz fikrlari bilan oʻrtoqlashdi.
“Zamin”ni Telegramʻda oʻqing!
