Bavariya jamoasidagi ijara muddatini yakunlab qaytgan Nicolas Jackson Chelsi klubining yangi bosh murabbiyi Xabi Alonso ixtiyoriga kelib qoʻshiladi. Senegalik hujumchi Stamford Bridgeda hamon yuqori baholanmoqda va u yangi mavsum oldidan jamoa bilan mashgʻulotlarga kirishadi. Bu haqda Goal.com xabar beradi.
Klub rahbariyati 24 yoshli futbolchini sotib yuborishdan oldin Xabi Alonso uning imkoniyatlarini shaxsan baholashini istamoqda. Jackson 2025-26 yilgi mavsumni Germaniyada oʻtkazgan boʻlsa-da, Daily Mail nashrining xabar berishicha, londonliklar ichki muhitida unga boʻlgan ishonch hali yoʻqolmagan.
Avvalroq sobiq murabbiy Enzo Maresca bilan yuzaga kelgan tushunmovchiliklar sababli jamoani tark etgan hujumchiga hozirda Angliya Premer-ligasi va boshqa xorijiy klublardan qiziqishlar mavjud. Biroq, 1-iyuldan ish boshlaydigan Alonso uning taqdirini hal qilmaguncha, transfer masalasi koʻrib chiqilmaydi.
Chelsi hujum chizigʻida raqobat ancha kuchli. Hozirda tarkibda Joao Pedro, Liam Delap va Emmanuel Emegha kabi futbolchilar bor. Kelasi mavsumda jamoaning yevrokuboklarda ishtirok etmasligi tarkibni qisqartirish zaruratini tugʻdirishi mumkin, ammo Jacksonning qanotlarda ham oʻynay olishi uning imkoniyatlarini oshiradi.
“Zamin”ni Telegramʻda oʻqing!
