Coca-Cola Superliganing 13-turidan o‘rin olgan "Lokomotiv" - "Nasaf" uchrashuvi bo‘lib o‘tdi. Ushbu o‘yinda mezbonlar 2:0 hisobida g‘alaba qozonishdi. Biz ushbu uchrashuv tahlilini e’tiboringizga havola etamiz.
Qaydnomaga nazar
O‘yinning tahliliga o‘tishdan avval dastlab uchrashuv qaydnomasiga nazar solsak. Bilamiz, 13-tur uchrashuvlari O‘zbekiston Superligasidagi yozgi transferlar oynasidan keyin davom ettirilmoqda. Mazkur transferlar chog‘ida "Lokomotiv" ham, "Nasaf" ham o‘z safiga futbolchilar qo‘shib olishdi. "Loko"da kecha asosiy tarkibda maydonga tushgan Jasur Jaloliddinov hamda zaxiradan o‘yinga qo‘shilgan Javohir Abdualimovlar mazkur jamoadagi debyutini o‘tkazishdi. Saytimiz xodimining ma’lum qilishicha Abdualimov "Olimpik" jamoasidan kelgan.
"Nasaf"da esa o‘yinni zaxiradan maydonga tushgan Bahrom Abdurahimov va Andriya Kaluderovichlar "Nasaf" safidagi joriy mavsumdagi debyutini o‘tkazishdi.
Amonovga atalgan o‘yin
"Lokomotiv" futbolchisi Temurxo‘ja Abduxoliqovning jarohat olgani haqida ma’lumot bor. Shu bois futbolchi bir necha o‘yinda maydonga tusha olmayapti. Uning o‘rniga hujum chizig‘ida o‘ynayotgan Azizbek Amonov esa yaxshi natija qayd etyapti. E’tibor bering, tanaffusdan avvalgi so‘nggi tur o‘yini — "Paxtakor" bilan o‘yinda ham Amonov gol urgan. "Lokomotiv" Tojikistonning "Istiqlol"iga qarshi kechgan bahsida ham u zaxiradan tushib gol urdi.
"Nasaf" bilan o‘yinda ham u dubl qayd eta oldi. Har ikki golni ham qarshiliklar himoyachilarining xatosi tufayli kirita olgan bo‘lsa-da, boshqa vaqtlarda ham uning ko‘rsatgan o‘yini e’tiborga loyiq. Ayniqsa, vaziyatlardan birida chap qanotda turib Javohir Siddiqovni to‘p bilan ta’minlagani ideal pas bo‘ldi, desa ham bo‘ladi.
Foto: "Lokomotiv" matbuot xizmati
Taniqli futbolchi Ikrom Aliboyev o‘zining Twitter sahifasida Amonovning o‘yinini Van Persinikiga o‘xshatishini yozib qoldirdi.
O‘yindan keyingi matbuot anjumani "Lokomotiv" bosh murabbiyi Mikael Sekeyraga Amonov haqida savol berdim. Uning ta’kidlashicha, murabbiy indivudial gapirishni yoqtirmaydi. "Umumiy jamoa haqida aytishim mumkin. Bugungi o‘yinda alohida gapirishga o‘rin yo‘q, bugun jamoaviy chiroyli o‘yin ko‘rsatib natijaga erishdik", — deya qo‘shimcha qiladi u.
"Nasaf" himoyasidagi xatolar va jamoaning o‘yini haqida
Dastlab, birinchi golni aytadigan bo‘lsak. "Nasaf" futbolchisi Jo‘rabek Mannonov maydon markazida to‘p orqaga — Marko Stanoyevichga oshirdi. U esa to‘pni to‘xtata olmadi va natijada Azizbek to‘pni olib qo‘yib oldinga yurdi. Amonov yana bir futbolchidan osonlikcha o‘tib ketdi va jarima maydonchasiga kirib zarba berdi va hisobni ochdi.
Ikkinchi golda "Nasaf" to‘pni maydon markazida ushlay olmadi. Xususan, Shuhrat Muhammadiyev Amonovga to‘ni uzatdi. Marko Stanoyevich va Dilshod Saitov to‘pni olisholmadi va natijada Azizbek Amonov to‘pni olib qo‘yib, 3 futbolchi qarshisidan yorib kirdi va hisobni 2:0 ko‘rinishiga keltirib qo‘ydi.
Matbuot anjumanida jamoa bosh murabbiyi Ro‘ziqul Berdiyev ham bu haqda fikr bildirdi. "Lokomotiv" himoyada yaxshi o‘ynab, qarshi hujumda bizni jazolashga urindi va bunga erishdi. Biz esa himoyada qo‘pol xatolar qildik. Oxirgi o‘yinlarda Amonov ko‘p gol urayotgani va yaxshi formada ekanini ta’kidlagandik", — deydi u.
Sekeyraning "avtobus"i
Kecha qaydnoma bo‘yicha toshkentliklar o‘yinni 4 nafar himoyachi bilan boshladi. Ikkinchi bo‘limning so‘nggi 10 daqiqaligida, hisob 2:0 holida, "Nasaf" oldinga o‘tib, gol uchun harakat qilayotgan chog‘da "Loko" tarkibida Diyor Turopov o‘rniga Dilshodjon Komilov maydonga tushdi va yanada himoya mustahkamlandi. 90+3 daqiqada o‘zi ikkinchi bo‘limda maydonga tushgan Javohir Siddiqov o‘rniga Javohir Abdualimov maydonga tushdi. U o‘ng qanot himoyadan o‘rin oldi va natijada 6 nafar himoyachi bilan himoyalandi jamoa.
O‘yindan so‘ng murabbiy bu taktika O‘zbekistonda qo‘rqinchli emasligini ta’kidladi. Kengroq ochilib bo‘sh joylardan foydalanishni bilish kerak. "Lokomotiv" mavsum boshidan shunaqa uslubda o‘ynayotgandi. "Nasaf"ga qarshi tanlagan uslubimiz ish berdi deb o‘ylayman", — deya qo‘shima qiladi u.
Texnika pand berganda yoxud hakamlik haqida
Ikkinchi taymning o‘rtalarida bosh hakam Zokir Qodirovdagi ba’zi texnik jihozlarda nosozlik paydo bo‘ldi va o‘yin taxminan 7-8 daqiqaga to‘xtab qoldi. Buning evaziga esa uchrashuvning asosiy vaqtiga 10 daqiqa vaqt qo‘shib berildi. Mayli, bu har turda ham bo‘lavermaydi. Texnika bor joyda nosozlik bo‘lishi normal holat.
O‘zi umuman hakamlar kecha o‘yinni yaxshi saviyada boshqarib borishdi. "Nasaf"ning hisobga olinmagan goli, Bahrom Abdurahimovga berilgan qizil kartochka, qisqasi barchasi adolatli bo‘ldi.
13-turning dastlabki ikki o‘yinidan biri yaxshi o‘tdi. Agar kecha "Nasaf"ning o‘yini ochilganida ko‘p ehtimol gollarga yanada boy bo‘lgan uchrashuv guvohi bo‘lishimiz aniq edi.
P.S.: o‘yin haqidagi fikrlar muallifning ko‘rganlari bo‘yicha yozildi. Albatta, sizning ushbu o‘yinga bo‘lgan qarashlaringiz boshqacha bo‘lishi mumkin va bu noto‘g‘ri degani emas.
Muallif: Og'abek Samisov
“Zamin” yangiliklarini “Instagram”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
HAMAS yetakchisi: Isroil Rafahga kirsa, Falastin xalqi oq bayroqni ko‘tarmaydi
Sariqmi yoki yashil: qaysi turdagi banan foydaliroq?
Crocus teraktida ayblanayotgan tojikistonlik Dalerjon Mirzoyevning ota-onasi o‘g‘li haqida gapirdi
Germaniyada maktab o‘quvchilari ommaviy ravishda islom dinini qabul qilmoqda
Toshkentda 02 kodli avtoraqamlar taxminan qachon paydo bo‘lishi aytildi
Rossiya dunyodagi birinchi vodorod yoqilg‘ili avtomobilni taqdim etdi
Qaysi kundalik odatlar immunitet pasayishiga olib kelishini bilasizmi?
Eron prezidenti jiddiy bayonot berdi: «Isroildan hech narsa qolmaydi»
