“Real” va “Barsa”dan kelgan bo‘lsa o‘ziga! Mourino “Roma”dan ketadiganlar ro‘yxatini berdi

“Roma”ni qudratli klublar safiga qo‘shish vazifasini uddalashga kirishgan Joze Mourinoga bu ishni uddalashda yordami tegmaydigan o‘yinchilarni aniqlab olishi uchun yarim mavsum kifoya qildi.

Aslida portugaliyalik mutaxassis Rimga kelganidayoq Edin Jeko, Pedro, Alessandro Florensi, Jengiz Under, Jastin Klyuyvert kabi bir necha mashhur o‘yinchilar ham poytaxtdan uzoqlashgandi. “Roma”dan ijaraga jo‘natilgan futbolchilarning o‘zidan yana bir jangovar tarkib tuzsa bo‘ladigan holat yuzaga keldi.

Mourino jamoani o‘ziga moslashtirishni davom ettirmoqda. Qishki transferlar vaqtida “Roma”ni tark etadigan o‘yinchilar nomi aniq bo‘ldi. Sport direktori Tyagu Pinto ayni paytda ularning masalasini hal qilish bilan shug‘ullanmoqda.

Ta’kidlash joizki, ispan grandlari – “Real” va “Barselona” akademiyalaridan chiqqan charm to‘p ustalari ham Mourinoning talabiga tortmay qoldi.

“Qirollik klubi” an’analariga xos tarzda tarbiya ko‘rgan hujumchi Borxa Mayoral joriy mavsumda bittadan gol va assist qayd etganiga qaramay, uning ishonchni oqlamagan o‘yinlari ko‘proq bo‘ldi va u yanvar ichi o‘ziga yangi jamoa topishga majbur. Yo‘qsa, ijara muddati tugagunga qadar zaxira o‘rindig‘ini isitadi. Tabiiyki, “Real”dek klub maktabini o‘tagan hujumchiga takliflar yo‘q emas, Hech bo‘lmaganda “Fiorentina” va “Kristal Pelas” bor.

“Barselona”dan ijaraga olinib, keyinchalik 12,5 million yevroga transfer huquqi sotib olingan Karles Peres ham o‘ziga sarflangan pullarni oqlamadi. Uning narxi muntazam pastlab, yetti million yevroga tushib qolgani ham buning isboti. Kataloniya maktabini ko‘rgan yigit A Seriya va Konferensiyalar ligasida 16 ta uchrashuvda 703 daqiqa o‘ynab, bir juft gol muallifi bo‘ldi. Hujumchining bu statistikasi Mourinoni umuman qoniqtirmadi va Peres ham ketadiganlar safiga qo‘shildi. Vaholanki, Peres ham xuddi Mayoral singari Mourino kelgunicha asosiy tarkibning muqim o‘yinchisi bo‘lgan.

Ispan futbolining yana bir vakili – Gonsalo Vilyar Mourino janoblariga umuman yoqmadi. “Elche” va “Valensiya” tarbiyalanuvchisi portugaliyalik murabbiy davrida asosiy tarkibga yaqinlasholmay qoldi. Avvalgi murabbiy Paulu Fonseka uni muntazam o‘ynatayotgan edi. A Seriya doirasida maydonga qadam bosmagan yarim himoyachi Konferensiyalar ligasida olti bor ko‘rinish berib, hech narsani uddalay olmadi.

Qizig‘i, ispan futboli a’zolarining birortasi portugaliyalik mutaxassisga to‘g‘ri kelmadi.

Asosiy tarkibga kira olmagan orasida eng yaxshi vaziyat Rikkardo Kalaforida. Bosh murabbiy 19 yoshli chap qanot himoyachisi bilan butunlay aloqani uzmoqchi emas. Faqatgina uni “Kalyari”ga ijaraga jo‘natib, “Roma”da o‘ynaydigan saviyaga ko‘tarilganidan keyin ortga qaytaradi.

“Roma”dagi faoliyati o‘zi istagandek yakunlanmaydiganlardan yana kimlar bor?
AQSHda futbol sir-asrorlarini o‘rgangan Brayan Reynoldsning saviyasi Yevropaga to‘g‘ri kelmadi. A Seriyada bitta o‘yin o‘tkazgan o‘ng qanot himoyachisi yurtiga qaytib ketishga yaqin turibdi. Agar u o‘ziga qiziqayotgan “Bryugge” va “Anderlext” kabi klublar sinovidan o‘tolmasa, ortga chekinishiga to‘g‘ri keladi.

Mourino sinab ko‘rishni ham o‘ziga ep ko‘rmagan italiyalik Davide Santon va agentinalik Federiko Fasio qaysar murabbiyning e’tiboriga tushaman, deb yarim yil vaqtini bekor o‘tkazdi. Bu o‘yinchilarga Italiya va Turkiya jamoalaridan ish chiqyapti, lekin ular maoshining katta qismidan voz kechib, kamtarroq mablag‘ evaziga anchagina ter to‘kishi kerak bo‘ladi.

Yana bir yarim himoyachi Amadu Diavara “Roma”dagi raqobatga dosh berolmadi. U mavsumning ikkinchi qismiga tayyorlanadigan pallada Afrika Millatlar ligasida qatnashish uchun Gvineya terma jamoasiga ketdi. Amadu bo‘lajak xalqaro musobaqada skautlar e’tiborini tortishga urinib ko‘radi. Hozircha, yosh futbolchiga “Kalyari” va Fransiyaning o‘rtamiyona jamoalari qiziqib turibdi.
“Zamin” yangiliklarini “Facebook”da kuzatib boring