16:30 / 07.01.2022

Mourino: «Roma»ning tarkibi o‘rtamiyona, shu sabab musobaqa jadvalida ham o‘rtada boryapmiz

«Roma» bosh murabbiyi Joze Mourino A Seriya 20-turi doirasida «Milan»ga qarshi o‘yindan (1:3) so‘ng o‘z fikrlarini bildirib o‘tdi.

- "Hatto 0:2 hisobida ham biz o‘yinda edik, ammo Rik Karsdorpning chetlatilishi bilan barchasi yakuniga yetdi.

Shu bilan birgalikda o‘yinimiz juda zaif o‘tganini aytishim mumkin. Dastlabki ikki golga qarasak, ular oddiy vaziyatlarda to‘pni oldirib qo‘yganimizdan so‘ng urildi. O‘yinimizda sifat yetishmadi. Bu bahsda hakamlarning ishi ham, jamoamning ham o‘yini menga yoqmadi.

Hakam va uning videoyordamchisiga sifat yetishmadi. Temmi Abraham qo‘li bilan harakat qilganini ko‘rdim, ammo bu to‘pni to‘xtatishga urinish emasdi. Agar bu uchun penalti belgilansa, ularning Zaniolo va Rojer Ibanesga qilgan qo‘polliklari uchun ham jarima belgilashi kerak edi. Yoki uchta penalti belgilang, yo umuman belgilamang.

Biz qabul qilinayotgan qarorlarda izchillikni ko‘rishni xohlaymiz, shuning uchun o‘yin saviyasi past bo‘ldi deyapman, undan tashqari hakamlarning ham omadi kelmadi. Hakam xarakter ko‘rsata olmadi. Biz kichik odamlarmiz.

Bu haqida gapirishni yoqtirmayman, ammo aytishga majburman, bu o‘yinda hakamlar va VAR nima qilganini tushunmadim.

Albatta, yaxshi o‘yin ko‘rsata olmaganimizni tan olaman. Tarkibimiz o‘rtamiyona, shu sabab musobaqa jadvalining o‘rtasida boryapmiz va ayni vaqtda ‘Roma’ning joyi o‘sha yerda. Juda ko‘p xatolarga yo‘l qo‘ydik, gap taktikada emas, individual qarorlarda edi.

Hozir eng yomoni — natija, chunki biz bir ochko ham ololmadik. Lekin bu intervyudan so‘ng keyingi o‘yinga ruhan tayyor bo‘laman (‘Yuventus’ga qarshi). Juda qiyin o‘yin bo‘ladi. Bizda ma’lum qiyinchiliklar bor, ammo ularni yengib o‘tishga harakat qilamiz", - dedi «Roma» bosh murabbiyi Joze Mourino.

Italiya chempionatining 20-turda «Milan» va «Roma» o‘rtasidagi bahs 3:1 hisobida milanliklarning g‘alabasi bilan yakunlandi. Milanliklarning dastlabki goli penaltidan urildi, shuningdek, hakam «Roma»ning ikki futbolchisiga qizil kartochka ko‘rsatdi. Uchrashuvni Daniel Kiffi boshchiligidagi hakamlar guruhi boshqarib bordi.