Mavsum boshida "Neftchi"ga oʻtgan futbolchi yoshini kichraytirgani ma'lum boʻldi

Futbolchilarning maqomi va oʻtishi boʻyicha qoʻmitasi Gʻofurov Anvarjon Xusanboy oʻgʻli ishi boʻyicha qaror chiqardi.

Oʻzbekiston futbolchilari uyushmasining Oʻzbekiston futbol assotsiatsiyasi Futbolchilarning maqomi va oʻtishi boʻyicha qoʻmitasiga yuborgan xatiga muvofiq futbolchi – Gʻofurov Anvarjon Xusanboy oʻgʻlining haqiqiy shaxsiy ma'lumotlari va ism-familiyasi boʻyicha hujjatlarni rasmiylashtirilishi bilan bogʻliq masala koʻrib chiqilgan.

Qoʻmita yigʻilishida futbolchi Gʻofurov Anvarjon Xusanboy oʻgʻlining vakili sifatida Oʻzbekiston futbolchilari uyushmasi raisi K.Murzoev futbolchi haqiqatda ham bundan bir necha yillar avval, ayrim oʻziga bogʻliq boʻlmagan sabablar tufayli oʻzining ma'lumotlarini, aniqrogʻi pasportdagi ismi va familiyasini ukasi – Gʻofurov Husniddin Xusanboy oʻgʻli nomiga rasmiylashtirgani va aynan ushbu ism va familiya ostida faoliyatini davom ettirganini ta'kidlab oʻtdi.

Jinoyat ishlari boʻyicha Fargʻona viloyat Buvayda tuman sudining 2020 yil 3 mart kunidagi hukmiga koʻra Gʻofurov Anvarjon Xusanboy oʻgʻlini ukasi Gʻofurov Husniddin Xusanboy oʻgʻli bilan bir-birlarining shaxsiy ma'lumotlari va ism-familiyalarini almashtirgan holda rasmiylashtirilgan fuqarolik pasportlari belgilangan tartibda yoʻq qilinib, ularning haqiqiy shaxsiy ma'lumotlari va ism-familiyalari boʻyicha fuqarolik pasportlari rasmiylashtirilishi ta'minlangan.

Qoʻmita ushbu vaziyatni oʻrganish davomida, futbolchi haqiqatda ham bunga oʻzi istamagan holda oʻsha vaqt faoliyatini boshlagan murabbiylari va ota-onasi qistovi bilan rozilik bergan degan xulosaga keldi.

Futbolchilarning maqomi va oʻtishi boʻyicha qoʻmitasi futbolchini oʻziga bogʻliq boʻlmagan sabablar tufayli hujjatlarini ukasining shaxsiy ma'lumotlari asosida rasmiylashtirgani, bu vaziyatdan chiqish uchun yordam soʻrab murojaat qilayotgani, uning futboldagi iqtidor va qobiliyatini inobatga olgan holda uning oʻziga tegishli shaxsiy ma'lumotlari asosida rasmiylashtirilgan mehnat shartnomasi va boshqa hujjatlarini Oʻzbekiston Professional futbol ligasidan roʻyxatdan oʻtkazishga ruxsat berishni hamda Gʻofurov Anvarjon Xusanboy oʻgʻliga jarima intizomiy jazo chorasini qoʻllash masalasini koʻrib chiqishni Oʻzbekiston futbol assotsiatsiyasi Tartib-intizom qoʻmitasiga havola etishni lozim topdi.

Futbolchilarning maqomi va oʻtishi boʻyicha qoʻmitasi tomonidan Gʻofurov Anvarjon Xusanboy oʻgʻliga uning haqiqiy shaxsiy ma'lumotlari va ism-familiyasi asosida rasmiylashtirilgan fuqarolik pasporti boʻyicha imzolangan mehnat shartnomasi va boshqa hujjatlarini Oʻzbekiston Professional futbol ligasidan roʻyxatdan oʻtkazilishiga ruxsat berish toʻgʻrisida qaror qabul qilingan. Shuningdek, mazkur qaror nusxasi Gʻofurov Anvarjon Husanboy oʻgʻliga nisbatan jarima intizomiy jazo chorasini qoʻllash masalasini koʻrib chiqish uchun Oʻzbekiston futbol assotsiatsiyasi Tartib-intizom qoʻmitasiga taqdim etilishi belgilandi.

“Zamin” yangiliklarini “Telegram”da kuzatib boring