Roʻziqul Berdiyev: "Metallurg"ning chet ellik murabbiyida hech qanday uslub koʻrmadim"

Superliganing 2-turidan oʻrin olgan "Nasaf" - "Metallurg" (1:1) uchrashuvidan keyin mezmonlar bosh murabbiyi Roʻziqul Berdiyev matbuot anjumanida ishtirok etdi.

- Oʻyin haqida
- Oʻyin ancha asabiy tarzda kechdi. "Metallurg" koʻproq himoyaga e'tibor qaratib oʻynashini bilardik. Ular qarshi hujumlar va standart vaziyatlarga tayanib oʻynashdi.

Oxirgi pallada diqqat-e'tiborimizni yoʻqotdik va bu uchun jazolandik. Birinchi taymga nisbatan ikkinchi taymda koʻproq vaziyatlar yaratdik.

Vaziyatlardan faqat bittasini golga aylantirdik. Oʻylaymanki, raqibdan yaxshiroq toʻp tepdik, ammo natija biz va muxlislar kutgandek boʻlmadi. Gʻalabani qoʻldan boy bergan boʻlsak-da, yigitlarga hech qanday e'tiroz yoʻq. Ular borini berib oʻynashdi.

- Mehmon jamoa ustozi xorijlik. Uning oʻyin uslubiga qanday baho berasiz?
- Hech qanday uslub koʻrmadim. Jamoa himoyalandi va uzun paslar bilan oʻynadi. "Metallurg" AGMK bilan bellashuvda ham himoyaga tayanib, qarshi hujumda oʻynagandi. Lekin bu – futbol, balki bu u tanlagan va yoqtirgan uslubdir. "Metallurg" futbolchilari koʻp vaziyatlarda maydonga yotib olishdi, bu esa muxlislarimizga yoqmadi. Albatta, ularning tanlagan va qoʻllagan taktikasi shu edi, bu ularga qoʻl keldi.

- Oʻtkazib yuborilgan golda raqib futbolchisi (Abror Toshqoʻziyev – tahr.) yolgʻiz qoldirildi. Bu himoyachilarning aybimidi?
- Umumiy qilib olsak, koʻpchilikning xatosi boʻldi. E'tiborni yoʻqotmaslik kerak edi. "Metallurg" kombinatsion standart vaziyatlarga urgʻu berishini bilardik. Oʻsha vaziyatda yosh oʻyinchimiz Akramov diqqat-e'tiborni yoʻqotib, xato qildi. Gol boʻlgan vaziyatda Umid Ergashevni xatosi bormidi deb oʻylagandim, ammo keyin bilsam, toʻp Husniddin Aliqulovga tegib, rikoshet orqali darvozaga kirib ketgan ekan.

- Gʻolib Gʻaybullayev qaydnomadan joy olmadi...
- Gʻolib "Navbahor" bilan bahsda kichik jarohat olgandi. Shu bois u qaydnomaga kiritilmadi.

- Oldinda "Nasaf"ni OChL pley-offi doirasidagi "Baniyas"ga qarshi muhim oʻyin kutmoqda. Jamoa oxirgi 3 oʻyinda gʻalaba qozona olmagani futbolchilarga salbiy ta'sir koʻrsatmaydimi?
- Albatta, bu borada ishlaymiz. Natijalar ta'sir qiladi, albatta. Biroq bu kabi holatlarga oldin ham duch kelganmiz. Oʻylaymanki, yigitlarni ruhiy holatini yaxshilaymiz.

- Bizdagi ma'lumotlarga koʻra, "Nasaf"ga Oʻzbekiston Kubogi mukofot puli va dekabr oyi maoshi berilmagani aytilmoqda. Bu qanchalik asosli?
- Bu narsa rost. Yoʻq desam notoʻgʻri boʻladi. Oʻylaymanki, bu qarzdorliklar ta'sir koʻrsatgani yoʻq. Rahbariyat tez orada bu masalani echadi. “Zamin” yangiliklarini “Telegram”da kuzatib boring