Bugungi kunda O‘zbekistonning birinchi raqamli futbolchisi bo‘lib turgan Eldor Shomurodov biz uchun allaqachon alohida mavzuga aylangan. Yevropaning top-5 chempionatida o‘ynashni orzu qilgan yigitimiz o‘z niyatiga erishgach, unga bo‘lgan e’tibor ham, munosabat ham allaqachon o‘zgargan. Endi u boshqa saviyada! Bunday darajadagi o‘yinchilarga esa hamma vaqt talab ham katta bo‘ladi.
Shomurodovning “Roma”dagi taqdiri ham borgan sari muhim masalalardan biriga aylanyapti. Ko‘pincha zaxirada qolayotgani sababli gap-so‘zlar ortib boryapti. “Roma”ning “Inter”ga qarshi o‘yinini ko‘rdingiz-a? Mourino Shomurodovni zaxiradan maydonga tushirdi. Ha, uning jamoasi yutqazdi, biroq biz uchun ahamiyatlisi hamyurtimizning o‘yini edi. Eldor o‘yinga yaxshi kirishib ketdi, Mxitaryanning goliga pas berdi va o‘yin mobaynida faol harakati bilan ajralib turdi. Natijada ko‘plab nufuzli nashrlar o‘zbek futbolchisining o‘yinini yuqori baholadilar. Endi Shomurodov va “Roma” Konferensiyalar ligasi yarim finalida Angliyaning “Lester” klubiga qarshi o‘yinga tayyorlanyapti. Bu bahs uch kundan keyin o‘tkaziladi.
Bugungi maqola orqali Shomurodovga doir eng so‘nggi muhim yangiliklarni yetkazamiz. Yodingizda bo‘lsa, Eldor 2020 yilning dekabr oyida ota bo‘lgan. Hozirda uning o‘g‘li bir yarim yoshda. Shomurodovlar oilasi yana bir quvonchli lahzaga tayyorlanishmoqda. Ya’ni, Eldor ikkinchi farzandini kutyapti. Ma’lumotlarga qaraganda, bir necha oydan so‘ng futbolchimiz yana bir bor otalik baxtiga muyassar bo‘ladi. Shu sababli tez orada Eldorning ota-onasi Rimga jo‘nab ketishi kutilyapti.
Mourino bilan munosabati qanday? Biz uchun yana bir muhim jihatlaridan biri bu shubhasiz Eldorning “Roma” bosh murabbiyi bilan munosabatining qandayligi bilan bog‘liq. Yodingizda bo‘lsa, “Shoma” O‘zbekiston terma jamoasidagi o‘yinlari uchun Toshkentga kelgandi. O‘shanda mahalliy OAVga bergan intervyusida Mourino bilan munosabati hozir boshidagidek emasligini tan olgandi. Aniqrog‘i, oldingidek u bilan ko‘p muloqot qilmayotganini aytgandi. Natijada uning “Roma”da zaxirada qolayotganining sababini ko‘pchilik o‘zicha topgandek bo‘ldi. Lekin Shomurodov va Mourino o‘rtasidagi munosabat siz va biz o‘ylagandek u qadar yomon emas.
Gap shundaki, mart oyida Namanganda o‘tkazilgan “Navruz CUP-2022” xalqaro musobaqasida Shomurodov to‘purarlik salohiyatini ko‘rsatdi. Qirg‘izistonga bitta, Ugandaga uchta gol urganidan biz ham quvongandik. Chunki anchadan beri “Roma” safida gol ura olmayotgani uchun uning terma jamoa safida gollar urgani o‘ziga bo‘lgan ishonchni yanada oshishiga xizmat qiladi. E’tiborlisi, Eldor terma jamoadan to‘g‘ri Rimga qaytganidan keyin Joze Mourinoning shaxsan o‘zi Shomurodov bilan O‘zbekiston terma jamoasidagi o‘yini va gollari yuzasidan gaplashgan.
Ayniqsa, futbolchimizning xet-trikka erishgani tufayli Joze “Xet-trik qilibsan, demak, O‘zbekistonda ham yaxshi hujumchilar bor ekan”, qabilida hazillashgan. Umuman olganda, Mourino klubidagi har qanday o‘yinchining terma jamoa ixtiyoridan qaytganidan keyin albatta ular bilan suhbatlashadi. Chunki u o‘z futbolchilarining terma tarkibida qanday o‘ynagani va qayd etgan natijalarini kuzatib boradi. Shuning uchun portugaliyalik mutaxassis hamyurtimizning O‘zbekiston milliy terma jamoasida kiritgan gollaridan xursand bo‘lgan.
Endi yana bir muhim masalaga to‘xtalmaqchimiz. Gap futbolchimizga qiziqish bildirayotgan klublar haqida. Aslida rasmiy taklif bilan oddiy qiziqish o‘rtasida katta farq bor. Unga shu qadar qiziqishlar ko‘pki, astiqo‘yaverasiz. Ammo rasmiy taklif bu boshqa masala. Futbolchiga yaqin manbaning aytishiga qaraganda, legionerimizga Italiyaning o‘zida ham xaridorlar talaygina.
Misol uchun “Fiorentina”, “Sassuolo”, “Torino” singari A Seriya klublari yangi mavsumda o‘z saflariga qo‘shib olishga tayyor turishibdi. Turkiyaning “Beshiktosh” jamoasidan ham Shomurodov bo‘yicha taklif borligi ma’lum bo‘ldi. Undan avval “Sevilya”, “Leypsig”, “Xoffenxaym” kabi klublar ham o‘zbek o‘yinchisiga ko‘z tikayotgani haqida xabarlar chiqqandi. Tez orada Eldorning agentlari Rimga yetib borishadi va mijozining kelajagi yuzasidan “Roma” rahbariyati bilan yana bir bor gaplashib ko‘radi.
Bu yerda hamma gap Mourinoda. Agar kelasi yil uchun rejalaridan Eldorga ham joy topiladigan bo‘lsa, ortiqcha tashvishga hojat yo‘q. Bizga yetib kelgan xabarga ko‘ra, “Roma” kelasi yili Abraxam bilan Zanoloni juda yaxshi narxga sotib yuborishi ham hech gap emas. Shunda yana bir hujumchi xarid qilinib, Shomurodov bilan yangi tandem hosil qilinish varianti ham murabbiy tomonidan ko‘rib chiqilyapti.
Joriy mavsum oxirigacha Eldor Shomurodov uchun hal qiluvchi ahamiyatga ega. Ayni paytda futbolchimiz yanada qo‘llab-quvvatlashga muxtoj. U “Roma”da o‘z so‘zini aytishi kerak. Ammo bunga ulguradimi-yo‘qmi? Shartnomasi 2024 yilgacha tuzilgan va tabiiyki, klub ham Shomurodov bilan bog‘liq vaziyatni obdon kuzatmoqda. Keyingi o‘yinlarda hamyurtimizga omad tilaymiz, zero, omad uning uchun juda muhim. “Zamin” yangiliklarini “Telegram”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Shavkat Mirziyoyev: “Falastinlik bolalar va ayollarni beg‘araz davolashga tayyormiz”
Har qanday katta yoshdagi kishi yetuk emas
Raqobat qo‘mitasi birjada Ai-80 benzini boshlang‘ich narxiga cheklov o‘rnatdi
NATO bosh kotibi Ukrainaning frontdagi ahvoli yomonlashganini tan oldi
Erdo‘g‘on Turkiya Isroil bilan aloqalarini uzganini ma’lum qildi
Blinken Isroildan uchta muammoni hal etishni talab qildi
Borrel YEIning Isroil bilan muloqotini to‘xtatishni taklif qildi
Ishchi-xodimlar manfaatlari himoya qilindi
