Apple kompaniyasi iPad va iPad Pro planshetlarining yangi avlodini taqdim etdi

Apple kompaniyasi yangi avlod iPad va iPad Pro planshetlarini taqdim etdi.

Yangi iPad modelining asosiy xususiyati standart USB-C ulagichining oʻrnatilishi boʻldi. U kompaniyaning an'anaviy Lightning ulagichi oʻrnini egalladi. Bundan tashqari, gadjet nozikroq ramkali 10,9 dyuymli displey, shuningdek, ultra keng burchakka ega 12 megapikselli old kameraga ega boʻldi.

Shuningdek, planshet simli quloqchin ulagichi va «Home» tugmasidan ayrildi. Uning funktsiyalari barmoq izi skaneri bilan birga quvvat tugmasiga oʻtkazildi.

Planshetga A14 Bionic protsessori oʻrnatilgan, undan iPad Air gadjetida ham foydalanilgan edi. Qurilma yuqori tezlikdagi Wi-Fi 6 simsiz lokal va 5G mobil aloqa tizimlarida ishlay oladi. Qoʻshma Shtatlarda uning narxi 449 dollardan boshlanadi.

iPad Pro planshetining yangi avlodi M2 chipsetini oldi. U grafika va axborotni qayta ishlashni sezilarli darajada yaxshilagan, shuningdek, qurilmaning umumiy tezligini oshirgan.

Bundan tashqari, planshetning sensorli ekrani yangilandi, u endi Apple Pencil stilusi harakatini ekran yuzasidan 12 mm balandlikda ham tiniq sezadi.

Yangi iPad Pro avvalgidek, diagonali 11 va 12,9 dyuymli displeyli, 8 yoki 16 Gb tezkor xotirali, shuningdek, har xil hajmdagi ichki xotiraga ega turli versiyalarda sotuvga chiqariladi. Qoʻshma Shtatlarda uning narxi versiyasiga qarab 799 dollardan 1299 dollargacha. Yangi iPad va iPad Pro rasman 26 oktyabrdan sotuvga chiqadi. “Zamin” yangiliklarini “Telegram”da kuzatib boring