Sun'iy intellekt yordamida Muhammad paygʻambar hayoti haqidagi ilk serial yaratildi

^{Foto: Qalbox}
Muhammad paygʻambarning hayoti haqidagi veb-serial birinchi marta sun'iy intellekt (SI) yordamida Pokiston va Singapur ijodkorlari tomonidan yaratildi. Bu haqda Arab News xabar berdi.

«Muhammad: olamlar uchun rahmat» (ing. «Muhammad: The Mercy for the Multiverse») deb nomlangan veb-serial musulmonlar uchun koʻngilochar videoxizmatlarni taqdim etuvchi MuslimPro tarkibiga kiruvchi Qalbox va ma'naviy ta'lim uchun onlayn platforma boʻlgan Qur'anscape hamkorligi mahsulidir.

MuslimPro veb-saytida paygʻambarning vizual tasvirini oʻz ichiga olmagan serial tavsifida shunday deyilgan:

«Paygʻambarimiz Muhammad alayhissalom hayotini, paygʻambarlikdan oldingi bosqichlarni, vahiydan keyingi qiyinchiliklarni va shafqatli tabiatini tasvirlovchi animatsion serialga shoʻngʻib keting».

Qalbox va Qur'anscape global dizayn jamoasi a'zolari Singapur, AQSh, Buyuk Britaniya va Pokistonda istiqomat qiladi. Texnik ishlarning asosiy qismi Pokistonda amalga oshirildi. Stsenariy muallifi pokistonlik Fotima Sattor boʻlib, serialga Qur'anscape bosh direktori boʻlgan pokistonlik Abbos Arslon prodyuserlik qildi.

Lohur shahrida joylashgan Prompt Media Lab asoschisi Imod Xolid esa serialga rejissyorlik qildi. Uning soʻzlariga koʻra, jamoa «chuqur mazmunli hikoyalarni bayon qilish uchun» generativ sun'iy intellektdan birinchilardan boʻlib foydalangan.

«Ushbu texnologiya bizga avlodlar uchun qadrli boʻlgan hikoyalarni bugungi kunning turli auditoriyalari uchun sodda va tushunarli tarzda taqdim etish imkonini berdi», dedi Xolid.

Stsenariy muallifi Fotima Sattor turkum uchun tadqiqotini mashhur pokistonlik-amerikalik olim Yosir Qoziy ma'ruzalari bilan boshlaganini aytdi.

«Muddat juda qisqa edi, shuning uchun men bundan ortigʻini oʻqishga ulgurmadim, lekin bizda muftiy (ulamo) bor, u barcha loyihalarni oʻqib chiqdi va men yoʻl qoʻygan xatolarni mehr bilan tuzatdi», dedi Sattor.

Ijrochi prodyuser Said Xonning aytishicha, Muhammad paygʻambar davrining oʻziga xos muhiti va madaniyatini qayta tiklash ba'zi muammolarni keltirib chiqargan. Tasvirlarni mualliflarni qoniqtiradigan darajada yaxshilash uchun SI tahrirlash vositalaridan keng foydalanilgan.

Serial 10 qismdan iborat boʻlib, ulardan ikkitasi MuslimPro tomonidan faqat Qalbox platformasida namoyish etiladi.

«Serial haqidagi sharhlar juda ijobiy boʻldi... Marketing va reklama harakatlari natijasida serial Qalbox platformasining eng muvaffaqiyatli shoularidan biriga aylandi», dedi Said Xon.

«Serial AQSh, Frantsiya, Indoneziya, Buyuk Britaniya, Kanada va Malayziya kabi mamlakatlarda yaxshi kutib olindi, tomoshabinlar yangi seriyalarni intizorlik bilan kutmoqda. Ijtimoiy tarmoqlardagi ijobiy sharhlar, tomoshabinlar serialni oila va doʻstlar bilan baham koʻrishi uning ta'siri yanada kengayib borishini ta'minlaydi», deb qoʻshimcha qildi Xon. “Zamin” yangiliklarini “Telegram”da kuzatib boring