21:19 / 25.01.2025

Dunyodagi eng yengil noutbuk ishlab chiqildi

Yaponiyaning Fujitsu kompaniyasi Intel Lunar Lake protsessoriga ega yangi FMV Note U nomli noutbukini taqdim etdi. Ishlab chiqaruvchining ma'lumotlariga koʻra, mazkur gadjet Copilot+ (takomillashtirilgan SI) oʻrnatilgan dunyodagi eng yengil noutbukdir.

^{Foto: Fujitsu}
Ultrabukning ogʻirligi 848 gramm, qalinligi esa 2,54 santimetrni tashkil etadi. Korpus ingichka boʻlishiga qaramay, u 64 Vt quvvatga ega katta hajmli akkumulyatorni oʻz ichiga olgan. Uning quvvati 36 soatgacha kutish rejimida ishlash imkonini beradi. Uzluksiz videolarni tomosha qilish vaqti esa 15,5 soatni tashkil etadi.

FMV Note U 1920x1200 pikselli, 14 dyuymli IPS panelga ega. Shuningdek, ultrabuk barmoq izlari uchun sensor va 1080p sifatli veb-kamera bilan jihozlangan.

^{Foto: Fujitsu}
Windows qurilmasining chipsetida 4,8 gigagers tezligiga ega toʻrtta yadro va Intel Arc Graphics 140 grafik moduli oʻrnatilgan. NPU (Neural Prpsessing Unit) maxsus protsessor chipi shovqinni kamaytirish, avtomatik subtitrlar, tasvir yaratish va Microsoft Recall uchun ilovalarni yaratish vaqtini tezlashtiradi.

FMV Note U noutbuki Thunderbolt 4-ni qoʻllab-quvvatlaydigan ikkita USB-C porti, ikkita USB-A porti, HDMI 2.1, microSD uchun slot, 3,5 mm quloqchin uchun slotga ega.

^{Foto: Fujitsu}
Bundan tashqari, mazkur noutbuk Gigabit Ethernet — ma'lumotlarni 1 gigabit/s (1 Gbps yoki 1000 Mbps) tezlikda uzatishga moʻljallangan tarmoq texnologiyasiga ham ega. Bu Ethernet standartlarining takomillashtirilgan versiyasi boʻlib, asosan, yuqori tezlikda ma'lumot uzatishni talab qiladigan tarmoq tizimlarida qoʻllaniladi. Bu tizim yengil noutbuklar uchun kamyobdir.

^{Foto: Fujitsu}
Fujitsu kompaniyasining noutbuklari faqat Yaponiya va AQShda sotiladi. Core Ultra 5 va 16/256 GB xotiraga ega asosiy model 214 000 iyena (≈1373 dollar) turadi. Flagman konfiguratsiyasi Core Ultra 7,32 GB operativ xotira va 2 TB xotira bilan birga keladi. Uning narxi 332 800 iyena (≈2135 dollar).