Rossiyada ilk buklanadigan smartfon sotuvga chiqishi arafasida

Rossiyada zamonaviy texnologiyalarga bo‘lgan qiziqish va talab yil sayin ortib borayotgan bir paytda, mamlakatning yetakchi kompaniyalaridan biri — "Red Soft" yangi va ilg‘or qurilmalar ishlab chiqarish borasida ulkan qadam tashlamoqda.

"Vedomosti" nashri yozishicha, kompaniya Xitoyning “Passion” korporatsiyasi bilan hamkorlikda birinchi marta keng omma uchun mo‘ljallangan buklanadigan smartfon ishlab chiqarishni rejalashtirmoqda. Bu yangilik nafaqat Rossiya bozori, balki butun mintaqa uchun texnologik burilish bo‘lishi mumkin.

"Red Soft" ijrochi direktori Mixail Tolpishkin ta’kidlaganidek, bu hamkorlik asosida yaratiladigan asosiy qurilma — MediaTek protsessori bilan jihozlangan, ekran qismlaridan egilib ochiladigan zamonaviy smartfon bo‘ladi. Kompaniya avval korporativ mijozlar bilan ishlagan bo‘lsa, endi ushbu flagman qurilma orqali oddiy iste’molchilar uchun ham ochiq savdoga chiqarishni mo‘ljallamoqda.

Yangi smartfonning to‘liq texnik xususiyatlari hali oshkor etilmadi, ammo u yuqori sifatli displey, kuchli kamera va foydalanuvchi uchun qulay interfeys bilan jihozlanishi kutilyapti. Uning asosiy afzalligi — buklanadigan (foldable) ekrani bo‘lib, bu turdagi smartfonlar ayni paytda jahon bozorida trendga aylangan.

Shuningdek, hamkorlik doirasida smartfondan tashqari planshetlar, noutbuklar va virtual reallik ko‘zoynaklari kabi mahsulotlarni ham ishlab chiqarish rejalashtirilgan.

Qurilmalarning rasmiy chakana savdosi 2025 yil yozida start olishi kutilayotgan bo‘lib, narxlar bo‘yicha ma’lumotlar keyinroq e’lon qilinadi. Shuningdek, "Red Soft" kompaniyasi Moskvadagi Afimoll savdo markazida o‘zining birinchi do‘konini ochishni ham mo‘ljal qilgan.

Bu qadam Rossiyaning texnologik mustaqilligi yo‘lida muhim bosqich bo‘lib, ichki bozordagi raqobatni yanada jonlantirishi kutilmoqda. Mahalliy ishlab chiqarishni yo‘lga qo‘yish rejasi esa qo‘shimcha ish o‘rinlari yaratilishi va texnologik salohiyatning o‘sishiga xizmat qiladi.

Muxlislar va yangi texnologiyalarga qiziquvchilar uchun bu — kutilgan va qiziqarli yangilik. Endi Rossiyada ham zamonaviy, zamon talabiga javob beradigan buklanadigan smartfonlarga ega bo‘lish imkoniyati paydo bo‘lmoqda. “Zamin”ni Telegramʻda oʻqing!