Pekinda jahon miqyosida birinchi insonsimon (gumanoid) robotlarga ixtisoslashgan do‘kon eshiklarini ochish arafasida turibdi. Unda faqat sotib olish emas, balki har bir robot imkoniyatlarini shaxsan sinab ko‘rish mumkin bo‘ladi. Loyiha mualliflari robotlar sotuvidan tashqari texnik xizmat ko‘rsatishni ham yo‘lga qo‘yishini ma’lum qilgan.
Avgustda ishga tushishi kutilmoqda bo‘lgan ushbu do‘kon – futurizm haqiqatga aylanayotganini namoyon etuvchi muhim qadam. Demo-zonada mijozlar robotlar bilan bevosita muloqotda bo‘lib, ularning harakatlanishi, aql-zakovati va turli vazifalarni bajarish qobiliyatini o‘z ko‘zlari bilan kuzatishi mumkin bo‘ladi.
Loyihaga dunyo bo‘ylab 30 dan ortiq ishlab chiqaruvchilar qo‘shilgan. Ular orasida Zeekr avtokompaniyasi uchun insonsimon robotlar tayyorlayotgan UBTech kabi ilg‘or startaplar ham bor. Bu esa do‘konda turli model va vazifalarga ega robotlar taqdim etilishini anglatadi.
Insonsimon robotlar – bu nafaqat kelajak texnologiyalari, balki kundalik hayotimizni yengillashtirishga qaratilgan amaliy yechimlardir. Xizmat ko‘rsatish, logistika, ta’lim, hatto xonadondagi yordamchi vazifalarini bajaruvchi robotlar endi haqiqiy bozor ishtirokchilariga aylanmoqda.
Mutasaddilar ta’kidlashicha, ushbu do‘kon nafaqat sotuv nuqtasi, balki innovatsion markaz sifatida ham faoliyat yuritadi. Robotlar sohasidagi yangi ishlanmalar va test jarayonlari ham shu yerda amalga oshiriladi.
Yakuniy so‘z o‘rnida shuni aytish mumkinki, Pekindagi ushbu tashabbus global robototexnika sanoatida yangi bosqichni boshlab berishi mumkin. Ilm-fan va amaliyotning ushbu uyg‘unligi insoniyatni intellektual mashinalar davriga yanada yaqinlashtirmoqda. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
