Apple 2027da shisha va ramkasiz iPhone taqdim etmoqchi!

Texnologiya olamining yetakchi kompaniyasi Apple yana bir inqilobiy yangilikka tayyorlanmoqda. Unga yaqin manbalarning xabar berishicha, kompaniya 2027 yilda iPhone turkumining 20 yilligi munosabati bilan tubdan yangilangan, ramkasiz va to‘liq shishadan yasalgan smartfonni namoyish etishni rejalashtirmoqda.

MacRumors sayti tarqatgan ma’lumotlarga ko‘ra, Apple hozirda yangi avlod iPhone modellari ustida faol ish olib bormoqda. Bloomberg muxbiri Mark Gurmanning ta’kidlashicha, yubiley modelida ekrandagi kesiklar butunlay yo‘qoladi, Dynamic Island bo‘limi ham ancha qisqartiriladi. Bu Apple uchun haqiqiy ramkasiz dizayn yo‘lidagi katta qadam bo‘lishi kutilmoqda.

Yubiley flagmanida ham ekran, ham korpus shishadan iborat bo‘ladi. Egri va yumaloq qirrali, ultra-ingichka ramkalar bilan jihozlangan ushbu smartfon Apple tarixidagi estetik jihatdan eng mukammal gadjet sifatida baholanishi mumkin.

Avvalroq The Information nashri 2026 yilda chiqishi kutilgan iPhone 18 Pro modellarida ekran ostiga joylashtirilgan Face ID texnologiyasi ishlatiladi deb xabar qilgan edi. Lekin Gurmanning yozishicha, kompaniya bu konsepsiyadan voz kechib, Dynamic Island ni qisqartirish orqali ekrandagi bo‘shliqlarni bartaraf etishni maqsad qilmoqda.

Ma’lumki, Apple har bir yubileyni innovatsion qurilma bilan nishonlash an’anasini shakllantirgan. Eslatib o‘tamiz, 2017 yilda kompaniya 10 yillikni Face ID va ekran “qosh”ga ega bo‘lgan iPhone X bilan nishonlagandi. 2027 yildagi 20 yillik uchun esa, yanada dahshatli dizayn yangiligi ko‘zlanmoqda.

Bloomberg ma’lumotiga ko‘ra, ushbu model uchun ilk bor Apple'ning sobiq bosh dizayneri Jonatan Ayv ilhom bergan. U o‘z vaqtida Apple uchun to‘liq shisha, yagona blokdan iborat smartfon konsepsiyasini taklif qilgan va bu orzusi endi amalga oshishi mumkin.

Shu bilan birga, mutaxassislar bunday gadjet yupqaligi va shisha materiallar sababli ayrim foydalanuvchilarda ehtiyotsizlik tuyg‘usini uyg‘otishi mumkinligini ta’kidlashmoqda. Biroq Apple o‘zining estetik qarashlari va original dizayn tamoyillaridan qaytishni rejalashtirmayapti.

2027 yilda namoyish etilishi kutilgan bu ramkasiz va shishadan iborat iPhone nafaqat texnologiya, balki san’at va dizayn yo‘nalishida ham yangi bosqichni boshlab berishi mumkin. Apple yana bir bor dunyo miqyosida ilg‘orlikka da’vo qilmoqda.
“Zamin”ni Telegramʻda oʻqing!