ChatGPT’da “Birga o‘rganamiz” funksiyasi paydo bo‘ldi

ChatGPT foydalanuvchilari orasida “Birga o‘rganamiz” nomli yangi funksiya paydo bo‘lgani haqida xabarlar tarqaldi, deb TechCrunch xabar berdi.

Ushbu rejim, ma’lumotlarga ko‘ra, chat-botni yanada samarali ta’limiy vositaga aylantirish maqsadida sinovdan o‘tkazilmoqda. U odatdagidek javob berish o‘rniga, ko‘proq savol beradi va insondan javob talab qiladi. Ba’zilar bu Google’ning LearnLM loyihasiga OpenAI’ning javobi bo‘lishi mumkinligini taxmin qilishmoqda. Shuningdek, ayrimlar bu rejimda bir nechta inson bir vaqtning o‘zida qatnashadigan “o‘quv guruhi” formati ham bo‘lishi mumkinligini aytishmoqda.

OpenAI bu funksiya haqida izoh bermagan. ChatGPT’ning o‘zi esa: “OpenAI hozircha ‘Study Together’ barchaga qachon yoki qanday shaklda taqdim etilishini, yoki bu ChatGPT Plus talab qiladimi — bu borada rasman ma’lumot bermagan”, deb javob bergan.

Bu funksiya qiziqarli, chunki ChatGPT ta’lim sohasida keng qo‘llanilayotgani va ba’zan noto‘g‘ri maqsadlarda ham ishlatilayotgani sir emas. O‘qituvchilar undan dars rejalarini tayyorlashda, talabalar esa uni repetitor sifatida yoki esse yozishda foydalanmoqda. Ayrimlar esa ChatGPT oliy ta’limni “yo‘q qilishi” mumkinligini ham ta’kidlashmoqda. “Birga o‘rganamiz” rejimi esa yaxshi maqsadlarda foydalanishni rag‘batlantirish, “ko‘chirish”ni esa cheklashga xizmat qilishi mumkin.

“Zamin”ni Telegramʻda oʻqing!