Apple kompaniyasi Xitoydagi ijtimoiy tarmoq — Weibo‘da Samsung‘ning yangi buklama smartfonini reklama qilgan videorolikni o‘z sahifasida joylashtirib yubordi. Bu voqea bir necha daqiqa ichida keng muhokamaga sabab bo‘ldi, deb yozadi Pravilamag nashri.
Apple'ning rasmiy bayonotiga ko‘ra, ushbu holat texnik xatolik natijasida yuz bergan. Kompaniya vakili shunday dedi: “AppleSupport faqatgina Apple bilan bog‘liq kontentni nashr qiladi. Buning qanday sodir bo‘lganini aniqlash uchun Weibo bilan birgalikda ish olib bormoqdamiz”.
Qizig‘i shundaki, Samsung smartfoni aks etgan videoga yozilgan matn Apple mahsulotlaridagi bolalar uchun mo‘ljallangan nazorat funksiyalarini targ‘ib qiluvchi xabar edi. Unda shunday deyilgan: “Qurilmangizda ota-ona nazoratini o‘rnatgan holda, farzandingiz App Store orqali yuklab olish va xarid qilish uchun bergan so‘rovlarini boshqarishingiz mumkin”.
Postning virusdek tarqalishi uzoqqa cho‘zilmadi — foydalanuvchilar tomonidan keng ko‘lamda o‘rtoqlashildi va hazillarga sabab bo‘ldi. Ayrim kuzatuvchilar bu xatoni Apple yozgi tajriba o‘tayotgan stajorni ishga olgani bilan bog‘lashdi. Ular shunday deb masxara qildilar: “Apple yozda stajorni ishga olgan va u bu vazifani uddalay olmadi”.
Bu kabi xatolar katta texnologik kompaniyalar ham inson omilidan xoli emasligini yana bir bor isbotlamoqda. Apple esa bu voqeadan keyin platformalardagi nazoratni yanada kuchaytirishga majbur bo‘lishi mumkin.
“Zamin”ni Telegramʻda oʻqing!
