Trampning 9 milliardlik yordami Intel'ni qutqara oladimi?

So‘nggi yillarda Intel kompaniyasi katta muammolarga duch keldi. U uzoq vaqt dunyodagi eng kuchli chip ishlab chiqaruvchi hisoblangan bo‘lsa-da, raqobatchilari — Tayvanning TSMC va AQShning Nvidia kompaniyalari undan oldinga o‘tib ketdi. Eng katta muammo esa yangi texnologiyalarni ishlab chiqarishda mijozlar yetishmasligi bo‘ldi.

Shuningdek, Intel ishlab chiqarayotgan yangi avlod chiplarida sifat muammolari kuzatilmoqda. Ishlab chiqarilgan chiplarning hammasi ham talabga javob bermayapti, bu esa kompaniyaning xarajatlarini ko‘paytirib, foyda olish imkonini kamaytirmoqda. Natijada Intel ketma-ket bir necha chorak davomida zarar ko‘rib kelmoqda.

Shu sharoitda AQSh hukumati kompaniyaga yordam berishga qaror qildi. Prezident Donald Tramp Intel’ga qariyb 9 milliard dollar sarmoya ajratishini e’lon qildi. Evaziga hukumat kompaniyaning qariyb 10 foiz ulushini qo‘lga kiritadi. Bu mablag‘ Intel uchun muhim bo‘lsa-da, u kompaniyaning texnik muammolarini to‘liq hal qilmaydi.

Mutaxassislarning aytishicha, agar Intel yangi texnologiyalarni mijozlarga muvaffaqiyatli taklif eta olmasa, davlat yordami foyda bermaydi. Chunki asosiy masala — yirik mijozlarni topish va chiplarning sifatini yaxshilashdir. Aks holda, kompaniya chip ishlab chiqarish bo‘yicha raqobatda orqada qolaveradi.

Natijada, Trampning bu qarori Intel’ga vaqtinchalik nafas olish imkonini bersa-da, uni qutqarib qolishi shubhali. Asosiy vazifa — kompaniyaning o‘z texnologiyalarini rivojlantirib, bozor ishonchini qaytarishidir. Davlat mablag‘i esa faqat yo‘lni biroz yengillashtirishi mumkin, xolos.