“Globe Soccer” tashkiloti 2025-yilning eng yaxshi futbolchisi sovrini uchun 25 nafar nomzod ro‘yxatini rasman e’lon qildi. Unda jahon futbolining eng kuchli yulduzlari, o‘tgan mavsumlarda yuqori natijalar qayd etgan hujumkor va yarim himoyachi futbolchilar jamlangan.
Nomzodlar orasida Kilian Mbappe, Erling Haaland, Vinisius Junior, Mohamed Salah, Xvicha Kvaratsxeliya kabi futbol olamining super yulduzlari bor. Shuningdek, “Bavariya” hujumchisi Garri Keyn, “Barselona” yosh iste’dodi Lamin Yamal ham ro‘yxatdan joy olgan.
Ushbu nomzodlar tarkibi Yevropa klublari vakillaridan shakllangan bo‘lib, ular 2024–2025-yilgi mavsumda o‘z jamoalari bilan yirik g‘alabalarga erishgan, shaxsiy statistikasi bilan ajralib turgan futbolchilardir. Tanlov yakunlari “Globe Soccer Awards”ning an’anaviy marosimida e’lon qilinadi.
Tashkilotchilarning ma’lum qilishicha, g‘olib ommaviy ovoz berish va ekspertlar hay’ati baholari asosida aniqlanadi. Ushbu ro‘yxat futbol muxlislari orasida katta qiziqish uyg‘otib, yilning eng nufuzli individual sovrinlaridan biri uchun kurashni yanada qizg‘inlashtirmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
