Windows Central jurnalisti Jez Korden bergan ma'lumotlarga ko'ra, StarCraft olamida yaratilayotgan yangi shuter o'yini ilk bor BlizzCon 2026 tadbirida ko'rsatilishi ehtimol. Tadbir sentyabr oyida o'tishi aytilmoqda va Kordenga ko'ra, bu safar BlizzConning asosiy urg'usi aynan StarCraft atrofida bo'lishi mumkin. Bu haqda playground.ru xabar beradi.
Manbaga ko'ra, gap uchinchi shaxs ko'rinishidagi shuter haqida ketmoqda va loyiha bir necha yildan beri ishlab chiqilayotgani tilga olinadi. Bu gaplar avvalgi sizib chiqishlar bilan ham mos: 2024 yilda Insider Gaming ham Jeyson Shrayyer ma'lumotlariga tayanib shu turdagi loyiha borligini yozgandi. Keyinroq o'yin Shrayyerning Play Nice: The Rise, Fall, and Future of Blizzard Entertainment kitobida ham eslatib o'tilgan, unda jamoaga Far Cry seriyasining sobiq ijodiy rahbari Den Hey yetakchilik qilayotgani qayd etiladi.
Hozircha o'yin haqida aniq tafsilotlar ochiqlanmagan, biroq uning mavjudligi haqidagi signalning o'zi muxlislar uchun ijobiy yangilik. Blizzard avval ham StarCraftni action formatiga olib chiqishga urinib ko'rgan: 2002 yilda StarCraft: Ghost e'lon qilingan, ammo loyiha muzlatilib, keyinchalik butunlay bekor qilingan.
2017 yilda chiqqan StarCraft: Remastereddan beri franshiza yangi relizlar bilan boyimadi. Seriyaning so'nggi original o'yini esa hanuz 2010 yildagi StarCraft II bo'lib qolmoqda.
“Zamin”ni Telegramʻda oʻqing!
