Apple o‘zining eng hamyonbop noutbuklaridan biri — yangi MacBook Neo modelini rasman taqdim qildi. Bu qurilma kompaniyaning odatiy noutbuk qatoridan bir jihati bilan keskin ajralib turadi: unda MacBook’lar uchun an’anaviy bo‘lib qolgan M-seriyali protsessor emas, balki A18 Pro chipi ishlatilgan. Aynan shu chip avval iPhone 16 Pro va iPhone 16 Pro Max smartfonlarida qo‘llangan edi.
Bu qaror Apple’ning yangi strategiyasi sifatida ko‘rilmoqda. Chunki kompaniya ilk bor MacBook’ni smartfon chipi asosida ommaviy va arzon segmentga moslashtirib chiqardi. Natijada MacBook Neo narxi ancha tushirildi: 256 GB xotirali versiya 599 dollardan, 512 GBli varianti esa 699 dollardan boshlanadi. Har ikki modelda ham 8 GB birlashgan tezkor xotira bor. Shu tariqa, MacBook Neo hozirgi qatordagi eng arzon Apple noutbukiga aylandi.
Yangi noutbuk 13 dyuymli Liquid Retina displey bilan jihozlangan. Apple rasmiy ma’lumotiga ko‘ra, ekran 2408×1506 aniqlik, 500 nit yorug‘lik va 1 milliard rangni qo‘llab-quvvatlaydi. Ya’ni bu qurilma “byudjet” deb atalsa-da, vizual jihatdan ancha jiddiy ko‘rinish beradi.
Avtonom ishlash masalasida ham Apple katta da’vo qilmoqda. Kompaniyaga ko‘ra, MacBook Neo 16 soatgacha video ko‘rish, hamda 11 soatgacha simsiz internetda ishlash imkonini beradi. Akkumulyatorning energiya sig‘imi 36,5 Vt/soatni tashkil etadi.
Qurilma tashqi ko‘rinishda ham yoshlarbop va ancha jonli kayfiyatda chiqarilgan. U kumushrang, indigo, blush va citrus ranglarda taqdim etildi. Shuningdek, arzon narxni ushlab turish uchun ayrim funksiyalar qisqartirilgan: masalan, bazaviy modelda Touch ID yo‘q, u faqat 512 GBli versiyada bor.
Qisqasi, Apple bu safar premium imidjdan chekinmagan holda, ommaviy segmentga qattiqroq kirib kelyapti. MacBook Neo — bu shunchaki yangi noutbuk emas, balki Windows noutbuklari va Chromebook’larga qarshi ochiq chaqiriq. Endi asosiy savol bitta: arzon MacBook haqiqatan ham bozorni titratadimi yoki bu faqat shov-shuvli start bo‘lib qoladimi?
“Zamin”ni Telegramʻda oʻqing!
