Texnologiya olamida shov-shuvli voqea yuz berdi. Germaniyaning nufuzli Notebookcheck portali CHUWI kompaniyasining CoreBook X noutbuklarida foydalanuvchilarni chalg'ituvchi holatni aniqladi. Ma'lum bo'lishicha, ishlab chiqaruvchi qurilma ichiga e'lon qilingan zamonaviy Ryzen 5 7430U protsessori o'rniga besh yil avvalgi eski modelni o'rnatgan. Bu haqda wylsa.com xabar beradi.
Mutaxassislar noutbuk korpusini ochib tekshirganda, uning ichida 2021 yilda taqdim etilgan Ryzen 5 5500U chipi borligi ma'lum bo'ldi. Eng qizig'i shundaki, kompaniya dasturiy ta'minot darajasida ham hiyla ishlatgan. BIOS va Windows vazifalar menejerida protsessor nomi ataylab Ryzen 5 7430U deb ko'rsatilgan, bu esa oddiy xaridor uchun firibgarlikni aniqlashni deyarli imkonsiz qiladi.
Ushbu holat yuzasidan izoh so'ralganda, CHUWI vakillari aybni tan olishdan bosh tortdi. Kompaniya buni logistika xatosi deb atab, sharhlovchilar qo'liga eski partiyadan qolgan noutbuk tushib qolganini da'vo qilmoqda. Biroq, dasturiy ta'minotdagi ataylab o'zgartirilgan ma'lumotlar bu bahona haqiqatga yaqin emasligini ko'rsatmoqda.
“Zamin”ni Telegramʻda oʻqing!
