Apple kompaniyasi o'zining mashhur iMac kompyuterlari turkumini yangilashga tayyorgarlik ko'rmoqda. Bloomberg nashri tahlilchisi Mark Gurman bergan ma'lumotlarga ko'ra, navbatdagi avlod monobloklari 2026 yil oxiriga borib sotuvga chiqariladi. Yangi qurilmalar tashqi ko'rinishi jihatidan 2021 yildan buyon o'zgarmagan dizaynni saqlab qoladi, biroq ularning ranglar palitrasi sezilarli darajada yangilanadi. Bu haqda rozetked.me xabar beradi.
Texnik jihatdan yangi iMac modellari Apple kompaniyasining eng so'nggi protsessorlari bilan jihozlanishi kutilmoqda. Mutaxassislar qurilma M5 yoki M6 chipi bazasida ishlashini taxmin qilishmoqda. M6 chipining o'zi 2026 yilning ikkinchi yarmida debyut qilishi kutilayotgani bois, yangi kompyuterlar unumdorlik bo'yicha katta sakrashni amalga oshirishi mumkin. Eslatib o'tamiz, 2024 yilda chiqarilgan M4 chipli iMac modellari yetti xil rangda taqdim etilgan edi.
Bundan tashqari, Apple ishlab chiqarish jarayonida innovatsion texnologiyalarni joriy etishni rejalashtirmoqda. Xususan, kompaniya kelajakda Apple Watch va iPhone qurilmalarining alyuminiy korpuslarini 3D printerlar yordamida chop etishni yo'lga qo'ymoqchi. Bu texnologiya ishlab chiqarish samaradorligini oshirish va resurslarni tejashga xizmat qiladi. Apple o'zining premium toifadagi Ultra qurilmalar qatorini kengaytirish ustida ham faol ish olib bormoqda.
“Zamin”ni Telegramʻda oʻqing!
