Mashhur DxOMark laboratoriyasi yangi flagman smartfonlar imkoniyatlarini sinovdan o'tkazdi. Natijalarga ko'ra, Samsung Galaxy S26 Ultra o'zidan oldingi avlodga nisbatan sezilarli o'sishga erishgan bo'lsa-da, Apple kompaniyasining iPhone 17 Pro modelini ortda qoldira olmadi. Bu haqda ixbt.com xabar beradi.
Galaxy S26 Ultra texnik jihatdan Galaxy S25 Ultra ga o'xshash bo'lsa-da, asosiy kamera sensori 200 megapikselga yetkazildi va yorug'likni 47 foizga ko'proq qabul qiluvchi f/1.4 diafragma bilan jihozlandi. Shuningdek, 5 karrali periskopik obyektivda ALoP texnologiyasi qo'llanilishi natijasida fon xiralashuvi yanada tabiiyroq ko'rinish olgan. Biroq, bu o'zgarishlar suratga olish masofasining biroz uzayishiga sabab bo'ldi.
DxOMark mutaxassislari Samsung smartfoni kam yorug'lik sharoitida shovqinlarni kamaytirib, detallarni yaxshiroq saqlashini e'tirof etishdi. Shunga qaramay, iPhone 17 Pro hali ham suratlar sifati va avtofokus aniqligi bo'yicha yetakchilikni saqlab qolmoqda. Sinovlar davomida Samsung qurilmasida yuzni aniqlashda ba'zi kamchiliklar va portret rejimida kichik artefaktlar kuzatilgan. Yakuniy xulosaga ko'ra, Apple flagmani tasvirni qayta ishlash va umumiy balans bo'yicha raqobatchisidan bir qadam oldinda turibdi.
“Zamin”ni Telegramʻda oʻqing!
