Britaniyalik muhandis soatiga 311 km tezlikda harakatlanuvchi paromotsikl yaratdi
Britaniyalik muhandis Grem Sayks "Force of Nature" deb nomlangan, soatiga 311 km tezlikda harakatlanuvchi noyob bug'li mototsikl yaratdi. Ushbu texnika qisqa masofada 338 km/soat tezlikka erishib, bug'li mototsikllar orasida mutlaq jahon rekordini yangiladi. Qurilma yuqori bosim ostida qizdirilgan suvning bug'ga aylanishi hisobiga harakatlanadi va start vaqtida haydovchiga 6 g darajasidagi kuchli yuklama beradi. Olti yillik mehnat mahsuli bo'lgan ushbu loyiha o'ta xavfli texnologiya hisoblangani sababli faqat maxsus poyga maydonlarida sinovdan o'tkazilmoqda.
Britaniyalik 62 yoshli muhandis Grem Sayks o'z ustaxonasida rafiqasi bilan birgalikda noyob bug'li mototsikl yaratdi. "Force of Nature" deb nomlangan ushbu texnika Santa Pod trassasida o'tkazilgan poygalarda hayratlanarli natija qayd etdi. Bu haqda 3dnews.ru xabar beradi.
Qurilma 400 metrli masofani 5,5 soniyada bosib o'tib, dunyodagi ikkinchi eng tezkor mototsiklga aylandi.
Mototsiklning ishlash prinsipi klassik parovozlardan tubdan farq qiladi. Undagi maxsus idishda 120 litr yuqori darajada tozalangan suv 260 darajagacha qizdiriladi.
Haydovchi tugmani bosganida, suv 50 atmosfera bosimi ostida tovushdan tez tezlikda tashqariga otilib chiqadi va bir zumda bug'ga aylanadi. Bu jarayonda har soniyada 40 litr suv sarflanadi.
Qisqa masofada, ya'ni 201 metrda ushbu texnika 338 km/soat tezlikka erishib, bug'li mototsikllar orasida mutlaq jahon rekordini o'rnatdi. Muhandisning so'zlariga ko'ra, start vaqtidagi yuklama 6 g darajasiga yetadi.
Loyiha ustida ishlar olti yildan buyon davom etmoqda va hozirda uning beshinchi versiyasi sinovdan o'tkazilmoqda.
Grem Sayks kelajakda 400 metrli masofani 5 soniyadan kamroq vaqt ichida bosib o'tishni maqsad qilgan. Biroq, ushbu texnologiya hech qachon oddiy yo'llarda harakatlanuvchi mototsikllarda qo'llanilmaydi.
Sababi, bunday yuqori bosim va harorat ham haydovchi, ham atrofidagilar uchun o'ta xavfli hisoblanadi.
Izohlar 0
…