AQShda Samsung smartfonlarini sotishni taqiqlash talab qilindi
AQSHda Lepton Computing LLC kompaniyasi Samsung ustidan sudga da’vo kiritib, uni buklama ekranli texnologiyalar bo‘yicha patent huquqlarini buzganlikda ayblamoqda. Da’vogarning ta’kidlashicha, Janubiy Koreya giganti 2013-yilda taqdim etilgan texnologik ishlanmalardan ruxsatsiz foydalanib, Galaxy Z Fold va Z Flip kabi ommabop modellarni ishlab chiqargan. Hozirda kompaniya Samsung’dan yirik miqdorda kompensatsiya to‘lashni hamda barcha buklama qurilmalar savdosini butunlay taqiqlashni talab qilmoqda. Ekspertlar ushbu da’voni "patent trollari"ning navbatdagi urinishi deb baholashsa-da, sud jarayoni smartfonlar bozoriga jiddiy ta’sir ko‘rsatishi mumkin.
AQShda smartfon sanoati bilan bog'liq navbatdagi patent mojarosi avj olmoqda. Lepton Computing LLC kompaniyasi Janubiy Koreyaning Samsung ishlab chiqaruvchisiga qarshi sudga da'vo arizasi kiritdi. Bu haqda Ixbt.com xabar beradi.
Da'voda qayd etilishicha, kompaniya buklama ekranli texnologiyalardan ruxsatsiz foydalanib kelmoqda.
Ushbu nizo Galaxy Z Fold, Galaxy Z Flip va hatto Galaxy Z TriFold kabi mashhur liniyalarga daxldordir. Da'vogar tomon egiluvchan ekranli smartfonlar arxitekturasiga oid asosiy patentlarga egalik qilishini ta'kidlamoqda.
Shu sababli Samsungdan moliyaviy kompensatsiya va royalti to'lovlari talab qilinmoqda.
Lepton Computing vakillarining so'zlariga ko'ra, ular 2013-yilda Samsung Electronics bilan hamkorlik masalalarini muhokama qilishgan. O'shanda texnologik detallar va prototiplar koreys gigantiga taqdim etilgan.
Biroq Samsung patentlar mavjudligini bilsa-da, ularni buzgan holda qurilmalar ishlab chiqarishni davom ettirgan.
Hozirda da'vogar nafaqat pul mablag'larini undirishni, balki barcha buklama qurilmalarni ishlab chiqarish va sotishni to'liq taqiqlashni ham so'ramoqda. Ekspertlar ushbu holatni patent trollari tomonidan amalga oshiriladigan navbatdagi urinish sifatida baholamoqda.
Izohlar 0
…