Dunyoning eng mashhur Linux distributivlaridan biri bo'lgan Ubuntu yaqin vaqt ichida sun'iy intellekt imkoniyatlari bilan boyitiladi. Canonical kompaniyasi muhandislik bo'yicha vitse-prezidenti Jon Siger kelgusi yil davomida operatsion tizimga yangi texnologiyalarni joriy etish rejasini e'lon qildi. Bu haqda Theverge.com xabar beradi.
Yangi funksiyalar ikki yo'nalishda rivojlantiriladi. Birinchidan, sun'iy intellekt modellari tizimning mavjud imkoniyatlarini fonda yaxshilaydi.
Ikkinchidan, foydalanuvchilar uchun maxsus «AI-native» ish jarayonlari va vositalari yaratiladi. Bu o'zgarishlar nutqni matnga aylantirish va shaxsiy avtomatlashtirish kabi qulayliklarni o'z ichiga oladi.
Sigerning ta'kidlashicha, Canonical modellarning shaffofligiga va ma'lumotlarni mahalliy qurilmaning o'zida qayta ishlashga ustuvor ahamiyat beradi. Shuningdek, kompaniya o'z muhandislarini ish jarayonida sun'iy intellektdan ko'proq foydalanishga undamoqda, biroq xodimlarning samaradorligi faqat yakuniy natijaga qarab baholanadi.
Yangi texnologiyalar Linux ekotizimiga yangi foydalanuvchilarni jalb qilishga ham yordam berishi kutilmoqda. Sun'iy intellekt yordamida zamonaviy Linux ishchi stansiyalarining murakkab jihatlarini soddalashtirish va tizim imkoniyatlarini kengroq auditoriyaga tushunarli qilish rejalashtirilgan.
“Zamin”ni Telegramʻda oʻqing!
