Etsy kompaniyasi ChatGPT platformasi ichida o‘zining maxsus ilovasini ishga tushirganini e’lon qildi. Bu yangilik xaridorlarga 100 milliondan ortiq mahsulotlar katalogini sun’iy intellekt yordamida yanada qulayroq izlash imkonini beradi. Endilikda foydalanuvchilar oddiy kalit so‘zlar o‘rniga, tabiiy tilda o‘z istaklarini bayon etishlari mumkin. Bu haqda Techcrunch.com xabar beradi.
Yangi funksiya beta-versiyada ishlamoqda va foydalanuvchilar ChatGPT ichida @Etsy belgisini qo‘llab, to‘g‘ridan-to‘g‘ri so‘rov yuborishlari mumkin. Tizim foydalanuvchi talablariga mos keladigan mahsulotlarni saralab beradi, ularni solishtirish va xarid qilish uchun Etsy saytiga o‘tish imkonini yaratadi.
Kompaniya ushbu integratsiyadan tashqari, o‘z platformasi ichida ham sun’iy intellektga asoslangan suhbatlashuvchi qidiruv tizimini sinovdan o‘tkazmoqda. Bu yordamchi xaridorlarga sovg‘alar tanlashda shaxsiy maslahatchi vazifasini bajaradi va xarid jarayonini soddalashtiradi.
Etsy o‘zining sun’iy intellekt strategiyasi doirasida sotuvchilar uchun ham yangi vositalarni taqdim etmoqda. Jumladan, mahsulot nomlari va tavsiflarini avtomatik yaratish hamda xaridorlar bilan muloqotni osonlashtiruvchi yozuv yordamchisi shular jumlasidandir. Shuningdek, platformada sun’iy intellekt yordamida yaratilgan kontentni belgilash uchun maxsus “Designed” yorlig‘i joriy etildi.
Etsy ChatGPT ichida o‘z ilovasini yaratgan Angi, SeatGeek, Tubi va Wix kabi kompaniyalar qatoriga qo‘shildi. Bu qadam kompaniyaning asosiy bozorini rivojlantirish va foydalanuvchilar faolligini oshirishga qaratilgan strategiyasining bir qismidir.
“Zamin”ni Telegramʻda oʻqing!
